തൃശൂർ: ജലജീവൻ മിഷൻ പദ്ധതി പ്രവൃത്തികൾക്കായി 1,48,115 ശുദ്ധജല കണക്ഷനുകൾ നൽകുന്നതിന് 372.25 കോടി രൂപയുടെ ഭരണാനുമതി നൽകി. കൊരട്ടി, വള്ളത്തോൾ നഗർ, തെക്കുംകര, അവിണിശ്ശേരി, വല്ലച്ചിറ, പാറളം, പരിയാരം, കാടുകുറ്റി, പുതുക്കാട്, തൃക്കൂർ, വടക്കേക്കാട്, പുന്നയൂർക്കുളം, പുന്നയൂർ, കടവല്ലൂർ, കാട്ടകാമ്പാൽ, പോർക്കുളം, നടത്തറ, കോലഴി, മുളങ്കുന്നത്ത്കാവ്, അടാട്ട്, അരിമ്പൂർ, മണലൂർ എന്നീ പഞ്ചായത്തുകൾക്കായി 71,704 കുടിവെള്ള കണക്ഷനുകൾ നൽകും.

പദ്ധതിയ്ക്കായി 55.83 കോടി രൂപയുടെ ഭരണാനുമതി നൽകുന്നതിന് സമിതി ശിപാർശ ചെയ്തു. ജലജീവൻ മിഷൻ പദ്ധതിയുടെ ഭാഗമായി ചേർന്ന ജില്ലാതല ജല ശുചിത്വ മിഷന്റെ ഓൺലൈൻ യോഗത്തിലാണ് തീരുമാനം. കളക്ടർ എസ്. ഷാനവാസ് അദ്ധ്യക്ഷനായി. ടി.എൻ പ്രതാപൻ എം.പി, ജില്ലാ പഞ്ചായത്ത് പ്രസിഡന്റ് പി.കെ ഡേവിസ് മാസ്റ്റർ, ജില്ലാ വികസന കമ്മീഷണർ അരുൺ കെ. വിജയൻ, വിവിധ വകുപ്പുകളിലെ ഉദ്യോഗസ്ഥർ എന്നിവർ പങ്കെടുത്തു.