ചാലക്കുടി: കൂടുതൽ വാക്‌സിൻ ലഭ്യമാക്കാൻ അടിയന്തര നടപടിയുമായി നഗരസഭ. കഴിഞ്ഞ ദിവസം ആരോഗ്യ വകുപ്പ് ഉദ്യോഗസ്ഥരുമായി ജനപ്രതിനിധികൾ നടത്തിയ കൂടിക്കാഴ്ചയിലാണ് തീരുമാനം. സ്‌പോട്ട് രജിസ്‌ട്രേഷനിലൂടെ കൂടുതൽ പേർക്ക് വാക്‌സിൻ നൽകും. ആർ.ആർ.ടി വളണ്ടിയർമാർക്ക് പ്രത്യേക മുൻഗണനയിൽ വാക്‌സിൻ ലഭ്യമാക്കും.
കിടപ്പ് രോഗികൾക്കും ശാരീരിക വൈകല്യങ്ങൾ ഉള്ളവർക്കും വീടുകളിൽ എത്തിയും പ്രാദേശിക സൗകര്യങ്ങൾ ഒരുക്കിയും നേരിട്ട് വാക്‌സിൻ നൽകും.
ഇതിനാവശ്യമായ മുഴുവൻ സൗകര്യങ്ങളും നഗരസഭ ഒരുക്കും. അടിയന്തരമായി വാക്‌സിൻ ലഭിക്കേണ്ട പ്രായാധിക്യം വന്നവർക്കും അസുഖ ബാധിതർക്കും ഉൾപ്പെടെയുള്ളവർക്ക് വാക്‌സിൻ നൽകുന്നതിന് സ്വകാര്യ ആശുപത്രികൾ വഴി സൗകര്യം ഒരുക്കുന്നത് സംബന്ധിച്ച് സർക്കാർ അനുമതി തേടും. ഇതിനാവശ്യമായ ചെലവ് നഗരസഭ വഹിക്കാൻ സന്നദ്ധമാണെന്നും അറിയിച്ചു. ചെയർമാർ വി.ഒ. പൈലപ്പൻ, പാർലിമെന്ററി പാർട്ടി ലീഡർ ഷിബു വാലപ്പൻ, പ്രതിപക്ഷ നേതാവ് സി.എസ്. സുരേഷ്, കൗൺസിലർ വൽസൻ ചമ്പക്കര, ഡെപ്യൂട്ടി ഡി.എം.ഒ. ഡോ. സതീഷ്, ഡോ. ജയന്തി എന്നിവർ ചർച്ചയിൽ പങ്കെടുത്തു.