കൊടുങ്ങല്ലൂർ: കൊവിഡ് പ്രതിരോധ പ്രവർത്തനങ്ങളുടെ ഭാഗമായി 40 ദിവസം മുമ്പ് വീടുവിട്ടിറങ്ങിയതാണ് അഴീക്കോട് മരപ്പാലം സ്വദേശികളായ ഈ അഞ്ചംഗ സംഘം. ഡി.വൈ.എഫ്.ഐ മേഖല പ്രസിഡന്റ് അനൂപ് കളറാട്ട്, മുൻ മേഖല ട്രഷറർ സഹീൽ മരപ്പാലം, മുൻ ബ്ലോക്ക് ജോയിന്റ് സെക്രട്ടറി സി.വി പ്രവീദ്, പ്രവർത്തകനായ അഷീർ, എസ്.എഫ്.ഐ ജില്ലാ കമ്മറ്റിയംഗം സജ്‌നാസ് എന്നിവരാണ് കൊവിഡ് രണ്ടാം തരംഗത്തിൽ മുഴുവൻ സമയ പ്രതിരോധ പ്രവർത്തനത്തിൽ സജീവമായി രംഗത്തുള്ളത്.
രോഗികളുടെ ഏത് ആവശ്യത്തിനും ഇവർ ഒപ്പമുണ്ടാകും. നാനൂറിലധികം തവണ ഇവരുടെ സ്‌നേഹവണ്ടി നാടിനു വേണ്ടി ഓടിക്കഴിഞ്ഞു. യുവാക്കളുടെ സാമൂഹിക പ്രതിബദ്ധത കണ്ടറിഞ്ഞ നാട്ടുകാരനായ സലാം തന്റെ ഉടമസ്ഥതയിലുള്ള കെട്ടിടത്തിലെ മുറി ഇവർക്ക് താമസത്തിനായി വിട്ടുകൊടുത്തു. സംഘത്തിലുള്ള അഷീറിന്റെയും, പ്രവീദിന്റെയും കാറുകളാണ് സ്‌നേഹവണ്ടികളായി ഓടുന്നത്.