ചാലക്കുടി: ഗ്രീൻ കൊരട്ടി കെയർ കൊരട്ടി പദ്ധതിയുടെ ഭാഗമായി കൊരട്ടി പഞ്ചായത്ത് ഗൃഹ ചൈതന്യം എന്ന പേരിൽ വീട്ടുമുറ്റത്ത് ഔഷധത്തോട്ടം പദ്ധതിക്ക് തുടക്കമിട്ടു. തൃശൂർ ഔഷധിയും കൊരട്ടി പഞ്ചായത്തും സംയുക്തമായി 19 വാർഡുകളിലും ഒരു ഓഷധത്തോട്ടം എന്ന നിലയിൽ 28 ഔഷധ തൈകളാണ് സൗജന്യമായി നൽകുന്നത്.

ഇതിന്റെ പരിപാലനം തോട്ടം ഉടമയും വാർഡ് വികസന സമിതിയും കുടി നിർവ്വഹിക്കും. കുട്ടനെല്ലൂർ ഔഷധിയുടെ മേൽനോട്ടവും പദ്ധതിക്ക് ലഭ്യമാക്കിയിട്ടുണ്ട്. കൊരട്ടി പഞ്ചായത്തിലെ മൂന്നാം വാർഡ് പാറക്കൂട്ടത്തിലായിരുന്നു പദ്ധതിക്ക് തുടക്കം കുറിച്ചത്. ഇതോടനുബന്ധിച്ച് വാർഡിലെ എല്ലാ വീടുകളിലേക്കും ഔഷധസസ്യങ്ങൾ നൽകി.

തൃശൂർ ജില്ലാ പഞ്ചായത്ത് പ്രസിഡന്റ് പി.കെ. ഡേവിസ് മാസ്റ്റർ ഉദ്ഘാടനം നിർവഹിച്ചു. പഞ്ചായത്ത് പ്രസിഡന്റ് പി.സി. ബിജു അദ്ധ്യക്ഷനായി. വൈസ് പ്രസിഡന്റ് ഷൈനി ഷാജി, സ്ഥിരം സമിതി ചെയർമാൻമാരായ അഡ്വ. കെ.ആർ. സുമേഷ്, നൈയ്‌നു റിച്ചു, ഔഷധി കോ- ഓർഡിനേറ്റർ സദാനന്ദൻ മാസ്റ്റർ ബ്ലോക്ക് പഞ്ചായത്ത് അംഗം സിന്ധു രവി, പഞ്ചായത്ത് അംഗങ്ങളായ ജിസ്സി പോൾ, പി.എസ്. സുമേഷ്, സി.വി. ദാമോദരൻ, മിഥുൻ മോഹൻ, ബാബു കണ്ണംമ്പിള്ളി എന്നിവർ പ്രസംഗിച്ചു.