തൃശൂർ: മൺസൂൺ മുന്നൊരുക്കം വിലയിരുത്തുന്നതിനായി എൻ.ഡി.ആർ.എഫ് സംഘം ജില്ലയിലെത്തി. കേരളത്തിലെ എൻ.ഡി.ആർ.എഫിന്റെ 9 കേന്ദ്രങ്ങൾ സന്ദർശിച്ച് സ്ഥിതിഗതികൾ വിലയിരുത്തുന്നതിന്റെ ഭാഗമായാണ് സംഘമെത്തിയത്. കളക്ടർ എസ്. ഷാനവാസുമായി കൂടിക്കാഴ്ച നടത്തിയ സംഘം ജില്ലയിലെ പ്രശ്‌നബാധിത പ്രദേശങ്ങളെക്കുറിച്ചും സുരക്ഷാ മുന്നൊരുക്കങ്ങളെക്കുറിച്ചും ചർച്ച നടത്തി. ചീഫ് മെഡിക്കൽ ഓഫീസർ ഡോ. സന്ദീപ് റോയ്, അസി. കമാൻഡർ മനോജ് പ്രഭാകർ എന്നിവരുടെ നേതൃത്വത്തിൽ അഞ്ചംഗ സംഘമാണ് ജില്ലയിലെത്തിയത്. ജില്ലയിൽ 125 ഹോട്ട്‌സ്‌പോട്ടുകൾ കണ്ടെത്തിയിട്ടുണ്ടെന്നും ഇത്തരം പ്രശ്‌ന സാദ്ധ്യതാ പ്രദേശങ്ങൾ സന്ദർശിക്കണമെന്നും അസി. കമാൻഡർ ആവശ്യപ്പെട്ടു. സംഘം രണ്ടാഴ്ചയോളം ജില്ലയിൽ തങ്ങി തീരദേശ ഗ്രാമങ്ങൾ, പ്രകൃതിക്ഷോഭ, ദുരന്ത സാദ്ധ്യതാ പ്രദേശങ്ങൾ സന്ദർശിച്ച് സ്ഥിതിഗതികൾ വിലയിരുത്തും. മലപ്പുറം, വയനാട്, കോഴിക്കോട് ജില്ലകളിലെ സന്ദർശനത്തിന് ശേഷമാണ് സംഘം തൃശൂരിലെത്തിയത്.