തിരുവനന്തപുരം: കാർഡിയോ തൊറാസിക് സർജറി വിഭാഗത്തിലെ സീനിയർ പ്രൊഫസറും ശ്രീചിത്ര ഇൻസ്റ്റിറ്റ്യൂട്ട് ഡയറക്ടറുമായ പ്രൊഫ.കെ. ജയകുമാർ രണ്ട് പതിറ്റാണ്ടിന്റെ സേവനത്തിന് ശേഷം ഇന്നലെ വിരമിച്ചു. 1981ൽ തിരുവനന്തപുരം മെഡിക്കൽ കോളേജിൽ കാർഡിയോ തൊറാസിക് സർജറി ലക്ചററായി ജോലിയിൽ പ്രവേശിച്ച അദ്ദേഹം 1995ൽ സൗത്ത് ഓസ്‌ട്രേലിയയിലെ അഡ്‌ലെയ്ഡിൽ റോയൽ അഡ്‌ലെയ്ഡ് ഹോസ്‌പിറ്റലിൽ കാർഡിയോ തൊറാസിക് സർജറിയിൽ സീനിയർ രജിസ്ട്രാറായി ജോലി ചെയ്‌തിട്ടുണ്ട്.

വീണ്ടും തിരുവനന്തപുരം മെഡിക്കൽ കോളേജിൽ കാർഡിയോ തൊറാസിക് സർജറി വിഭാഗത്തിൽ പ്രൊഫസറായി പ്രവേശിക്കുകയും കൊറോണറി ആർട്ടറി ബൈപ്പാസ് സർജറിയുടെ സ്ഥിരവിഭാഗം ആരംഭിക്കുകയും ചെയ്‌തു. കാലിക്കറ്റ് മെഡിക്കൽ കോളേജിലും അദ്ദേഹം പ്രവർത്തിച്ചു. 2001ൽ ശ്രീചിത്ര ഇൻസ്റ്റിറ്റ്യൂട്ടിൽ കാർഡിയോ വാസ്‌കുലർ ആൻഡ് തൊറാസിക് സർജറി വിഭാഗത്തിൽ പ്രൊഫസറായി നിയമിക്കപ്പെട്ട അദ്ദേഹം 2021 വരെയുള്ള സേവനകാലത്ത് പതിനായിരത്തിലധികം പ്രധാന ഹൃദയ ശസ്ത്രക്രിയകൾ നടത്തി. അദ്ദേഹത്തിനു കീഴിൽ നൂറിലധികം റസിഡന്റ്സ് പരിശീലനം നേടിയിട്ടുണ്ട്. 2006ൽ ശ്രീ ചിത്രയിലെ ഗവേണിംഗ് ബോഡി അംഗമായി നാമനിർദ്ദേശം ചെയ്യപ്പെട്ട അദ്ദേഹം 2014 മുതൽ എസ്.സി.ടി ടൈംഡ് സ്ഥാപക ഡയറക്ടർ ബോർഡ് അംഗവുമായിരുന്നു.