തിരുവനന്തപുരം: പൊതുജനങ്ങളുടെ ആവശ്യം മുൻനിറുത്തി തമ്പാനൂർ കെ.എസ്.ആർ.ടി.സി സെൻട്രൽ സ്റ്റാൻഡിൽ സപ്ലൈകോയുടെ സൂപ്പർമാർക്ക് ആരംഭിക്കുന്നു. നിലവിൽ സോണൽ എക്‌സിക്യുട്ടീവ് ഓഫീസ് സ്ഥിതി ചെയ്യുന്ന കെട്ടിടത്തിലാണ് സൂപ്പർ മാർക്കറ്റ് തുടങ്ങുക. ആദ്യഘട്ടമെന്ന നിലയിൽ സോണൽ ഓഫീസ് പാപ്പനംകോട്ടേക്ക് മാറ്റുമെന്ന് മന്ത്രി ആന്റണി രാജു അറിയിച്ചു.
കെ.എസ്.ആർ.ടി.സി ബസ് സ്റ്റാൻഡിനെയും ഈ കെട്ടിടത്തെയും വേർതിരിക്കുന്ന കൂറ്റൻ മതിൽ പൊളിച്ച് സൗകര്യപ്രദമായ രീതിയിൽ പ്രവേശനം ഒരുക്കും. വാടകയ്‌ക്കാണ് കെ.എസ്.ആർ.ടി.സി കെട്ടിടം നൽകുക. പൊതുജനങ്ങൾക്ക് കൂടി ഉപയോഗിക്കാൻ സ്റ്റാൻഡിനകത്തെ പമ്പ്, റോഡ് സൈഡിലേക്ക് മാറ്റിസ്ഥാപിക്കുന്നതിനുള്ള നടപടികൾ ഉടൻ തുടങ്ങുമെന്നും മന്ത്രി വ്യക്തമാക്കി. ചിങ്ങം ഒന്നിന് സൂപ്പർമാർക്കറ്റ് ആരംഭിക്കാനാണ് ശ്രമമെന്ന് മന്ത്രി ജി.ആർ. അനിൽ പറഞ്ഞു.

തമ്പാനൂരിലെത്തുന്ന യാത്രക്കാർക്ക് കൂടുതൽ ഫലപ്രദമായ രീതിയിലാകും സൗകര്യങ്ങൾ ഒരുക്കുക. മന്ത്രിമാർ തമ്പാനൂർ ബസ് സ്റ്റാൻഡിലെ സൗകര്യങ്ങൾ വിലയിരുത്തി. ഗതാഗത സെക്രട്ടറിയും കെ.എസ്.ആർ.ടി.സി സി.എം.ഡിയുമായ ബിജുപ്രഭാകറും ഒപ്പമുണ്ടായിരുന്നു.