തിരുവനന്തപുരം: പാലക്കാട്, ഷൊർണൂർ മുനിസിപ്പാലിറ്റിയിൽപെട്ട 400 പ്ലോട്ടുകൾ കേരള നെൽവയൽ നീർത്തട സംരക്ഷണ നിയമ പ്രകാരം തയാറാക്കിയ ഡേറ്റാ ബാങ്കിൽ നിന്നു ഒഴിവാക്കിയതിനെക്കുറിച്ച് അന്വേഷിക്കാൻ കൃഷി മന്ത്രി പി.പ്രസാദ് ഉത്തരവിട്ടു. കാർഷികോല്പാദന കമ്മിഷണർ അടിയന്തര അന്വേഷണം നടത്തി റിപ്പോർട്ട് സമർപ്പിക്കാനാണ് നിർദേശം.
ഏപ്രിൽ 21 നാണ് ഷൊർണൂർ മുനിസിപ്പൽ സെക്രട്ടറി വിജ്ഞാപനം ഇറക്കിയത്. സർക്കാർ ഉത്തരവ് പ്രകാരം കൃഷി വകുപ്പിൽ നിന്നുള്ള റിപ്പോർട്ടിന്റെ അടിസ്ഥാനത്തിൽ ആർ.ഡി.ഒയ്ക്ക് മാത്രമേ കൃഷി ഭൂമിയെ ഡേറ്റാ ബാങ്കിൽ നിന്ന് ഒഴിവാക്കുന്നതിന് അധികാരമുള്ളൂ.

കെ.എസ്.ആർ.ഇ.സി (കേരള സ്റ്റേറ്റ് റിമോട്ട് സെൻസിംഗ് ആൻഡ് എൻവയോൺമെന്റ് സെന്റർ) തയ്യാറാക്കിയ ഉപഗ്രഹ ചിത്രം ആധാരമാക്കി പ്രാദേശിക സമിതി യോഗത്തിലെ തീരുമാന പ്രകാരമാണ് ഷൊർണൂർ മുനിസിപ്പൽ സെക്രട്ടറി ഡാറ്റാ ബാങ്ക് തിരുത്തിക്കൊണ്ട് ഉത്തരവ് ഇറക്കിയത്.