തിരുവനന്തപുരം: പ്ലസ് വൺ പരീക്ഷയെ ബാധിക്കാത്ത വിധത്തിലായിരിക്കും പ്ലസ് ടുവിനുള്ള ഫസ്റ്റ്‌ബെൽ ക്ലാസുകൾ. പ്ലസ് വൺ പരീക്ഷയ്ക്ക് ഒരു മാസം മുൻപ് പ്ലസ് ടു ക്ലാസുകൾ നിറുത്തും. ഇക്കാര്യത്തിൽ വിദ്യാർത്ഥികൾ ആശങ്കപ്പെടേണ്ടതില്ലെന്ന് കൈറ്റ് സി.ഇ.ഒ അൻവർ സാദത്ത് അറിയിച്ചു.

പ്ലസ് വൺ പരീക്ഷ പൂർത്തിയാകാതെ പ്ലസ് ടു ക്ലാസുകൾ ആരംഭിച്ചതിൽ ആശങ്കപ്പെട്ടുള്ള കുട്ടികളുടെ പ്രതികരണങ്ങളിലാണ് വിശദീകരണം. തിങ്കളാഴ്ച മുതൽ പ്ലസ് ടു ക്ലാസുകൾ ട്രയൽ അടിസ്ഥാനത്തിൽ കൈറ്റ് വിക്ടേഴ്സ് ചാനലിൽ ആരംഭിച്ചിരുന്നു. സെ്പ്തംബർ ആറു മുതലാണ് പ്ലസ് വൺ പരീക്ഷ. അതിന് ഒരു മാസം മുൻപ് പ്ലസ് ടു ക്ലാസുകൾ നിറുത്തും. തുടർന്ന്, പ്ലസ് വൺ പരീക്ഷയുടെ ഫോക്കസ് ഏരിയ അടിസ്ഥാനമാക്കിയുള്ള റിവിഷൻ ക്ലാസുകളും സംശയ നിവാരണത്തിനുള്ള ലൈവ് ഫോൺ-ഇൻ-പരിപാടികളുമായിരിക്കും സംപ്രേഷണം ചെയ്യുക. ഈ റിവിഷൻ ക്ലാസുകളും പരീക്ഷകളും കഴിഞ്ഞ ശേഷമായിരിക്കും പ്ലസ് ടു ക്ലാസുകളുടെ തുടർ സംപ്രേഷണം.

ജൂണിൽ തന്നെ പ്ലസ് ടു ക്ലാസുകളുടെ സംപ്രേഷണം ആരംഭിച്ചത് കൂടുതൽ പഠനദിനങ്ങൾ ലഭിക്കാനാണ്. അതോടൊപ്പം, ഈ ആഴ്ചയിലെ ട്രയലും ജൂൺ 14 മുതൽ 18 വരെയുള്ള പുനഃസംപ്രേഷണവും കഴിഞ്ഞ ശേഷം കുട്ടികൾക്ക് ക്ലാസുകൾ കാണാനുള്ള അവസരം ഉറപ്പാക്കും. അതിന് ശേഷമേ ക്ലാസുകൾ പുനരാരംഭിക്കൂ.