പാലോട്: വാമനപുരം റേഞ്ചിലെ വിവിധ സ്ഥലങ്ങളിൽ നടത്തിയ പരിശോധനയിൽ 245 ലിറ്റർ കോട കണ്ടെത്തി. കഴിഞ്ഞ ദിവസം നടത്തിയ റെയ്ഡിൽ പാലോട് അഞ്ചാനകുഴിക്കര സ്വപ്ന വിലാസത്തിൽ അശോകന്റെ വീട്ടിൽ നിന്നും 105 ലിറ്റർ കോടയും ഇന്നലെ രാത്രി നടത്തിയ റെയ്ഡിൽ മീൻമുട്ടി പാലുവള്ളി ചോനൻവിള ലക്ഷംവീട് കോളനി ജംഗ്ഷന് സമീപം മഹേഷ് ഭവനിൽ മോനായി എന്ന് വിളിക്കുന്ന മഹേഷിന്റെ വീട്ടിൽനിന്നും 140 ലിറ്റർ കോടയും കണ്ടെത്തി കേസെടുത്തു. മദ്യഷാപ്പുകൾ അടഞ്ഞു കിടക്കുന്നതിനാൽ വ്യാജമദ്യ നിർമ്മാണവും വിതരണവും മയക്കുമരുന്ന് ഉപയോഗവും വർദ്ധിച്ചിട്ടുണ്ടെന്നും അതിനെതിരെ കർശന നടപടികൾ സ്വീകരിക്കുമെന്നും എക്സൈസ് ഇൻസ്പെക്ടർ ജി.മോഹൻകുമാർ അറിയിച്ചു. പ്രിവന്റീവ് ഓഫീസർമാരായ ഷാജി, മനോജ് കുമാർ, സിവിൽ എക്സൈസ് ഓഫീസർമാരായ സജീവ്കുമാർ, അൻസർ, വിഷ്ണു, അനിരുദ്ധൻ, വനിതാ സിവിൽ എക്സൈസ് ഓഫീസർ മഞ്ജുഷ എന്നിവർ പങ്കെടുത്തു.