വിതുര: പേപ്പാറ ഡാമിൽ ജലനിരപ്പ് ഉയർന്നതിനെ തുടർന്ന് ഡാമിലെ നാല് ഷട്ടറുകളും ഇന്ന് രാവിലെ ആറിന് അഞ്ചു സെന്റീമീറ്റർ വീതം ഉയർത്തുമെന്ന് ജില്ലാ കളക്ടർ അറിയിച്ചു. പേപ്പാറ വനമേഖലയിലും, വൃഷ്ടി പ്രദേശത്തും ഇന്നലെ കനത്ത മഴ പെയ്തിരുന്നു. ഇതിനെ തുടർന്ന് ഡാമിൽ ഒരു മീറ്ററിൽ കൂടുതൽ ജലനിരപ്പ് ഉയർന്നു. ഇതോടെയാണ് ഡാമിലെ ഷട്ടർ ഉയർത്തുവാൻ കളക്ടർ നിർദേശം നൽകിയത്. നാല് ഷട്ടറും 5സെന്റീമീറ്റർ വീതം ഉയർത്തി ജലനിരപ്പ് 104മീറ്റർ ആക്കി കുറയ്ക്കും. നിലവിലെ ജലനിരപ്പ് 105.20മീറ്റർ ആണ്. സംഭരണശേഷി 110 മീറ്ററും. സാധാരണ ജലനിരപ്പ് 107 മീറ്റർ എത്തുമ്പോൾ ആണ് ഡാം തുറക്കാറുള്ളത്. പേപ്പാറ വനമേഖലയിൽ ശക്തമായ മഴ പെയ്യുന്നതിനാൽ ജലനിരപ്പ് ഇനിയും ഉയരുവാൻ സാധ്യതയുണ്ട്. ഇന്ന് 20സെന്റീമീറ്റർ ആണ് തുറന്ന് വിടുന്നത്. വീണ്ടും ജലനിരപ്പ് ഉയർന്നാൽ കൂടുതൽ ഷട്ടറുകൾ ഉയർത്തുവാനാണ് തീരുമാനം. ജലനിരപ്പ് ഉയർന്നതിനെ തുടർന്ന് കഴിഞ്ഞ ആഴ്ചയും ഡാമിലെ ഷട്ടർ ഉയർത്തി ജലനിരപ്പ് 104 മീറ്റർ ആയി താഴ്ത്തിയിരുന്നു.