തിരുവനന്തപുരം: സ്വർണക്കടത്ത് വിവാദങ്ങളെത്തുടർന്ന് ഡിപ്ലോമാ​റ്റിക് വിഭാഗത്തിൽപ്പെടാത്ത കരാർ ജീവനക്കാരെ പുറത്താക്കി തിരുവനന്തപുരത്തെ യു.എ.ഇ കോൺസുലേറ്റ്. സ്വർണക്കടത്ത് പ്രതി സ്വപ്നയുടെ ശുപാർശയിലായിരുന്നു താത്കാലിക ജീവനക്കാരിൽ മിക്കവരെയും നിയമിച്ചിരുന്നത്. കോൺസുലേറ്റിലെ ഡിപ്ലോമാ​റ്റിക് വിഭാഗത്തിൽപ്പെടുന്ന ഉദ്യോഗസ്ഥരിൽ ചിലരെ യു.എ.ഇ സ്ഥലം മാ​റ്റിയിട്ടുണ്ട്. കോൺസുൽ ജനറലായിരുന്ന ജമാൽ ഹുസൈൻ അൽസാബിയെ മറ്റൊരു ചുമതലയിലേക്ക് മാറ്റി. ഡിപ്ലോമാ​റ്റിക് വിഭാഗത്തിലുള്ളവരെ നിയമിക്കുന്നത് യു.എ.ഇ വിദേശകാര്യ മന്ത്രാലയമാണ്. മറ്റ് വിഭാഗങ്ങളിലുള്ളവരെയും ഇനിമുതൽ നേരിട്ട് നിയമിക്കാനാണ് യു.എ.ഇയുടെ തീരുമാനം.