തിരുവനന്തപുരം: സ്‌കൂൾ വിദ്യാർത്ഥികളുടെ ഓൺലൈൻ പഠനവുമായി ബന്ധപ്പെട്ട് ജില്ലാ ഭരണകൂടം നടത്തിയ പഠന റിപ്പോർട്ട് കളക്ടർ ഡോ. നവ്‌ജ്യോത് ഖോസ മുഖ്യമന്ത്രി പിണറായി വിജയന് സമർപ്പിച്ചു. ജില്ലാ ഭരണകൂടത്തിന്റെ 'ട്രിവാൻഡ്രം എഹെഡ് " എന്ന ഉദ്യമത്തിനു കീഴിലാണ് പഠനം നടത്തിയത്. ജില്ലയിലെ തിരഞ്ഞെടുക്കപ്പെട്ട 35 സർക്കാർ, എയ്ഡഡ്, അൺഎയ്ഡഡ് സ്‌കൂളുകളിലാണ് സർവേ നടത്തിയത്. ജില്ലാ മാനസികാരോഗ്യ പരിപാടിയുടെയും പൊതുവിദ്യാഭ്യാസ ഡെപ്യൂട്ടി ഡയറക്ടറേറ്റിന്റെയും സഹകരണത്തോടെ സിഫൈവ് എന്ന സന്നദ്ധ സംഘടനയാണ് പഠനം നടത്തിയത്. ലൊയോള കോളേജിലെയും ഇഗ്‌നോ സെന്ററിലെയും എം.എസ്.ഡബ്ല്യു വാളന്റിയർമാരും സഹകരിച്ചു. റിപ്പോർട്ടിന്റെ പകർപ്പ് പൊതുവിദ്യാഭ്യാസ മന്ത്രി വി. ശിവൻകുട്ടിക്കും സമർപ്പിച്ചു.