തിരുവനന്തപുരം: വെള്ളയമ്പലം ഇന്ദിരാഭവനിൽ നടന്ന കെ.പി.സി.സി പ്രസിഡന്റ് കെ.സുധാകരന്റെ സ്ഥാനമേൽക്കൽ ചടങ്ങിൽ സാമൂഹിക അകലം പാലിക്കാത്തതിന് പ്രദേശിക നേതാക്കളടക്കം നൂറോളം പേർക്കെതിരേ കേസ്. പകർച്ചവ്യാധി നിയന്ത്രണ നിയമ പ്രകാരം മ്യൂസിയം പൊലീസാണ് കേസെടുത്തത്. കൊവിഡ് മാനദണ്ഡങ്ങൾ പാലിക്കാതെ കെ.പി.സി.സി ഓഫീസിൽ തിക്കും തിരക്കും ഉണ്ടാക്കിയതിനാണ് സ്വമേധയാ കേസെടുത്തത്. മണക്കാട് സുരേഷ്, മണ്ണാമൂല രാജേഷ്, സജു കവടിയാർ, കല്ലംപള്ളി ഹരിദാസ്, സുദർശനൻ, പാളയം ഉദയൻ തുടങ്ങിയ പ്രദേശിക നേതാക്കളടക്കം കണ്ടാലറിയാവുന്ന നൂറോളം പേർക്കെതിരേയാണ് കേസ്.