തിരുവനന്തപുരം: മഹാത്മാ അയ്യങ്കാളിയുടെ 80-ാം ചരമവാർഷികദിനം ആചരിച്ച് തലസ്ഥാനം. വിവിധ സംഘടനകളുടെ നേതൃത്വത്തിൽ കൊവിഡ് പ്രോട്ടോക്കോൾ പാലിച്ചാണ് അനുസ്മരണം നടത്തിയത്. ഡി.സി.സിയുടെ നേതൃത്വത്തിൽ വെള്ളയമ്പലത്തെ അയ്യങ്കാളി പ്രതിമയിൽ പുഷ്പാർച്ചന നടത്തി. ഡി.സി.സി പ്രസിഡന്റ് നെയ്യാറ്റിൻകര സനൽ,​ ദളിത്‌ കോൺഗ്രസ് സംസ്ഥാന പ്രസിഡന്റ് കെ.കെ. ഷാജു, ഡി.സി.സി ഭാരവാഹികളായ കടകംപള്ളി ഹരിദാസ്, ആർ. ഹരികുമാർ, പാളയം ഉദയൻ എന്നിവർ പങ്കെടുത്തു.

കേരള പുലയർമഹാസഭ സംസ്ഥാന കമ്മിറ്റിയുടെ ആഭിമുഖ്യത്തിൽ ജില്ലാ,​ താലൂക്ക് യൂണിയൻ തലത്തിൽ അയ്യങ്കാളിയുടെ ഛായാചിത്രത്തിൽ പുഷ്പാർച്ചന നടത്തി. കെ.പി.എം.എസ് ജില്ലാ കമ്മിറ്റി വെങ്ങാനൂർ മഹാത്മാ അയ്യങ്കാളി സ്മൃതി മണ്ഡപത്തിൽ നടത്തിയ അനുസ്മരണ സമ്മേളനത്തിൽ നേതാക്കളായ ഡോ. സുരേന്ദ്രനാഥ്,​ ചാല മോഹനൻ,​ ചെറുവയ്ക്കൽ അർജുനൻ,​ തിരുമുല്ലവാരം രാജു,​ എസ്.എസ്. അജയകുമാർ,​ കോളിയൂർ ചന്ദ്രൻ,​ സി.വി. രാജു,​ ദിലീപ് കുമാർ,​ പ്രേം സാഗർ തുടങ്ങിയവർ പങ്കെടുത്തു.

ഭാരതീയ ദളിത് കോൺഗ്രസ് സംസ്ഥാന കമ്മിറ്റി വെള്ളയമ്പലം സ്ക്വയറിൽ നടത്തിയ അനുസ്മരണം മുൻ മന്ത്രി വി.എസ്. ശിവകുമാർ ഉദ്ഘാടനം ചെയ്തു. ഭാരതീയ ദളിത് കോൺഗ്രസ് സംസ്ഥാന പ്രസിഡന്റ് കെ.കെ. ഷാജു അദ്ധ്യക്ഷനായി. നേതാക്കളായ പേരൂർക്കട രവി,​ കടകംപള്ളി ഹരിദാസ്,​ പാളയം ഉദയൻ,​ ആർ. ഹരികുമാർ തുടങ്ങിയവർ പങ്കെടുത്തു. കേരള ചേരമർ സംഘത്തിന്റെ നേതൃത്വത്തിൽ വെള്ളയമ്പലം അയ്യങ്കാളി പ്രതിമയിൽ സംസ്ഥാന ജനറൽ സെക്രട്ടറി നെയ്യാറ്റിൻകര സത്യശീലൻ,​ ആറയൂർ കെ.പി. ചെല്ലപ്പൻ,​ കൊല്ലയിൽ ഷാജി,​ എ.ബി. സജു എന്നിവർ പുഷ്പാർച്ചന നടത്തി.