തിരുവനന്തപുരം: വിദേശത്ത് പോകുന്നവർക്കുള്ള വാക്സിനേഷൻ സർട്ടിഫിക്കറ്റിൽ ബാച്ച് നമ്പരും തീയതിയും ചേർക്കുമെന്ന് ആരോഗ്യ വകുപ്പ് മന്ത്രി വീണാ ജോർജ് അറിയിച്ചു. ചില രാജ്യങ്ങൾ വാക്സിനെടുത്ത തീയതിയും വാക്സിൻ ബാച്ച് നമ്പരും ആവശ്യപ്പെടുന്ന പശ്ചാത്തലത്തിലാണിത്. നാളെ മുതൽ ബാച്ച് നമ്പരും തീയതിയും ചേർത്ത പുതിയ സർട്ടിഫിക്കറ്റ് ലഭിക്കും. നേരത്തെ സർട്ടിഫിക്കറ്റ് എടുത്തവർക്ക് ആവശ്യമുണ്ടെങ്കിൽ പുതിയ സർട്ടിഫിക്കറ്റ് നൽകും.
വിദേശത്ത് പോകുന്നവർക്ക് ഉടൻ തന്നെ സർട്ടിഫിക്കറ്റ് നൽകുന്നതിനുള്ള ക്രമീകരണങ്ങൾ പോർട്ടലിൽ വരുത്തിയിട്ടുണ്ട്. വാക്സിൻ നൽകി കഴിയുമ്പോൾ വ്യക്തിയുടെ രജിസ്റ്റർ ചെയ്ത മൊബൈൽ നമ്പരിൽ, സർട്ടിഫിക്കറ്റ് നമ്പർ അടങ്ങിയ എസ്.എം.എസ് ലഭിക്കും. ഉടൻ തന്നെ അവർക്ക് പോർട്ടലിൽ നിന്നും സർട്ടിഫിക്കറ്റ് ഡൗൺ ലോഡ് ചെയ്യാം. കൂടുതൽ സംശയങ്ങൾക്ക് ദിശ 1056, 104 എന്ന നമ്പരുകളിൽ ബന്ധപ്പെടാം.

നടപടി

# ||covid19.kerala.gov.in|vaccine| എന്ന പോർട്ടലിൽ പ്രവേശിച്ച് പഴയ സർട്ടിഫിക്കറ്റ് റദ്ദാക്കി പുതിയതിന് അപേക്ഷിക്കണം.

# മുമ്പ് ബാച്ച് നമ്പരും തീയതിയുമുള്ള കൊവിൻ സർട്ടിഫിക്കറ്റ് ലഭിച്ചിട്ടുള്ളവർ അത് പോർട്ടലിൽ അപ് ലോഡ് ചെയ്യണം.

# കൊവിൻ പോർട്ടലിൽ നിന്നു സർട്ടിഫിക്കറ്റ് ലഭിക്കാത്തവർ വാക്സിൻ എടുത്ത കേന്ദ്രത്തിൽ നിന്നു ബാച്ച് നമ്പരും തീയതിയും എഴുതി വാങ്ങിയ സർട്ടിഫിക്കറ്റ് അപ് ലോഡ് ചെയ്യണം.

# അപേക്ഷകൾ പരിശോധിച്ച് തീയതിയും ബാച്ച് നമ്പരുമുള്ള പുതിയ സർട്ടിഫിക്കറ്റ് നൽകും.

# പിന്നീട് പുതിയ സർട്ടിഫിക്കറ്റ് ഈ പോർട്ടലിൽ നിന്നു ഡൗൺലോഡ് ചെയ്യാം.