തിരുവനന്തപുരം: കൊവിഡ് നിമിത്തം കുടുംബത്തിലെ വരുമാനദായകനായിരുന്ന വ്യക്തി മരണമടഞ്ഞതിനെ തുടർന്ന് സാമ്പത്തിക ബുദ്ധിമുട്ട് അനുഭവിക്കുന്ന കുടുംബങ്ങളെ സഹായിക്കുന്നതിനുവേണ്ടി കേന്ദ്ര സാമൂഹിക നീതിയും ശാക്തീകരണവും വകുപ്പ് ആവിഷ്‌കരിച്ച വായ്പാപദ്ധതി പ്രകാരം ഒ.ബി.സി വിഭാഗത്തിൽപ്പെട്ട അർഹരായ ഗുണഭോക്താക്കളിൽ നിന്ന് കേരള സംസ്ഥാന പിന്നാക്ക വിഭാഗ വികസന കോർപ്പറേഷൻ അപേക്ഷ ക്ഷണിക്കുന്നു.
3 ലക്ഷം രൂപയിൽ താഴെ കുടുംബ വാർഷിക വരുമാനമുള്ള ഒ.ബി.സി വിഭാഗത്തിൽപ്പെട്ട കുടുംബങ്ങൾക്കാണ് വായ്പ ലഭിക്കുന്നത്. 5 ലക്ഷം രൂപ വരെ അടങ്കൽ വരുന്ന സ്വയം തൊഴിൽ സംരംഭങ്ങൾ ആരംഭിക്കുന്നതിന് ആവശ്യമായ മുഴുവൻ തുകയും പദ്ധതി പ്രകാരം അനുവദിക്കും. ഇതിൽ പദ്ധതി അടങ്കലിന്റെ 80 ശതമാനം തുക (പരമാവധി 4 ലക്ഷം രൂപ) വായ്പയും ബാക്കി 20ശതമാനം (പരമാവധി 1 ലക്ഷം രൂപ) സബ്സിഡിയുമാണ്. വായ്പാ തിരിച്ചടവ് കാലാവധി 5 വർഷമാണ്. വാർഷിക പലിശ നിരക്ക് 6 ശതമാനം. പദ്ധതി പ്രകാരം സംരംഭങ്ങൾ ആരംഭിക്കുന്നതിന് യോഗ്യതയും താല്പര്യവും ഉള്ളവർ അവരുടെ വിശദാംശങ്ങൾ 28 നകം www.ksbcdc.com എന്ന കോർപ്പറേഷൻ വെബ്‌സൈറ്റിൽ രജിസ്റ്റർ ചെയ്യണം.