വിതുര: കൊവിഡ് മഹാമാരി കാലത്ത് വായനയ്ക്ക് പ്രസക്തിയേറിയെന്നും, ഗ്രന്ഥശാലാ പ്രവർത്തനങ്ങൾ സജീവമായെന്നും തിരുവനന്തപുരം ജില്ലാ ലൈബ്രറി കൗൺസിൽ സെക്രട്ടറി പേരയം ശശി അഭിപ്രായപ്പെട്ടു. നെടുമങ്ങാട് താലൂക്ക് ലൈബ്രറി കൗൺസിലിന്റെ നേതൃത്വത്തിൽ ജൂൺ 19 മുതൽ ജൂലായ് 7 വരെ നടക്കുന്ന വായനപക്ഷാചരണം പരിപാടിയുടെ താലൂക്ക് തല ഉദ്ഘാടനം നിർവഹിക്കുകയായിരുന്ന അദ്ദേഹം. തൊളിക്കോട് പുളിച്ചാമല സന്ധ്യ ഗ്രാമീണ ഗ്രന്ഥശാലയിൽ നടന്ന ഉദ്ഘാടനയോഗത്തിൽ താലൂക്ക് ലൈബ്രറി കൗൺസിൽ വൈസ് പ്രസിഡൻറ് പിജി. പ്രേമചന്ദ്രൻ അദ്ധ്യക്ഷത വഹിച്ചു. ജില്ലാ പ്രസിഡന്റ് കാഞ്ഞിരംപാറ മോഹനൻ, തൊളിക്കോട് പഞ്ചായത്ത് പ്രസിഡന്റ് വി.ജെ. സുരേഷ്, വൈസ് പ്രസിഡന്റ് ബി.സുശീല, തുരുത്തി വാർഡ്‌മെമ്പർ എൻ.എസ്. ഹാഷിം, വിതുര നേതൃസമിതി കൺവീനർ എസ്. ബിനു, പുളിച്ചാമല സന്ധ്യ ഗ്രാമീണ ഗ്രന്ഥശാലാ പ്രസിഡന്റ് ഭദ്രം ജി. ശശി, താലൂക്ക് ലൈബ്രറി കൗൺസിൽ ജോയിന്റ് സെക്രട്ടറി കെ. മുരുകൻ, നേതൃസമിതി കൺവീനർ ആർ. കെ. രാഹുൽ എന്നിവർ പങ്കെടുത്തു.

ഫോട്ടോ

നെടുമങ്ങാട് താലൂക്ക് ലൈബ്രറി കൗൺസിൽ സംഘടിപ്പിച്ച വായനാപക്ഷാചരണത്തിന്റെ താലൂക്ക് തല ഉദ്ഘാടനം പുളിച്ചാമലയിൽ ലൈബ്രറി കൗൺസിൽ ജില്ലാ സെക്രട്ടറി പേരയം ശശി നിർവഹിക്കുന്നു. വി. ജെ. സുരേഷ്, ബി.സുശീല, എൻ. എസ്. ഹാഷിം, കാഞ്ഞിരംപാറമോഹനൻ എന്നിവർ സമീപം.