തിരുവനന്തപുരം: കാർഷിക മേഖലയിലെ മൂല്യവർദ്ധിത ഉത്പന്നങ്ങളുടെ സംരംഭകത്വം പ്രോത്സാഹിപ്പിക്കുന്നതിനായി വ്യവസായ വാണിജ്യ വകുപ്പ് നടപ്പാക്കുന്ന അഗ്രോ ബിസിനസ് ഇൻക്യുബേഷൻ ഫോർ സസ്‌റ്റൈനബിൾ എന്റർപ്രണർഷിപ്പ് പദ്ധതിയുടെ ഭാഗമായി തിരുവനന്തപുരത്ത് ബോധവത്കരണ പരിപാടി സംഘടിപ്പിച്ചു. ഓൺലൈനായി സംഘടിപ്പിച്ച പരിപാടി മേയർ ആര്യ രാജേന്ദ്രൻ ഉദ്ഘാടനം ചെയ്തു.100 പേർക്കായാണ് പരിപാടി സംഘടിപ്പിച്ചത്. ജില്ലാ വ്യവസായ കേന്ദ്രം ജനറൽ മാനേജർ ജി. രാജീവ് അദ്ധ്യക്ഷനായി. കേരള ഇൻസ്റ്റിറ്റ്യൂട്ട് ഫോർ എന്റർപ്രണർഷിപ് ഡെവലപ്‌മെന്റ് സി.ഇ.ഒയും എക്സിക്യൂട്ടിവ് ഡയറക്ടറുമായ ശരത് വി. രാജ് പദ്ധതിയെക്കുറിച്ചും സാദ്ധ്യതകളെക്കുറിച്ചുമുള്ള സെഷനും കൃഷി വിജ്ഞാനകേന്ദ്രം തലവനും പ്രിൻസിപ്പൽ സയന്റിസ്റ്റുമായ ഡോ. ബിനു ജോൺ സാം മൂല്യവർദ്ധിത ഉത്പന്നങ്ങളെക്കുറിച്ചുള്ള ടെക്‌നിക്കൽ സെഷനും അവതരിപ്പിച്ചു.