തിരുവനന്തപുരം: സാമൂഹ്യനീതി വകുപ്പ് വഴി നടപ്പാക്കുന്ന പ്രൊബേഷൻ സേവനങ്ങളുടെ ഭാഗമായി മുൻ കുറ്റവാളികൾ, പ്രൊബേഷണർമാർ, കുറ്റവാളികളുടെ ആശ്രിതർ എന്നിവർക്കുള്ള സ്വയംതൊഴിൽ ധനസഹായ പദ്ധതി, കുറ്റകൃത്യത്തിന് ഇരയായി മരണപ്പെട്ടവരുടെ ആശ്രിതരുടെയും ഗുരുതരമായി പരിക്കേറ്റവരുടെയും പുനരധിവാസ പദ്ധതി, കുറ്റകൃത്യത്തിന് ഇരയായവരുടെ മക്കൾക്കുള്ള വിദ്യാഭ്യാസ ധനസഹായ പദ്ധതി, തടവുകാരുടെ പെൺമക്കൾക്കുള്ള വിവാഹ ധനസഹായ പദ്ധതി എന്നിവയ്ക്കായി ജില്ലയിലെ അർഹരായവരിൽ നിന്ന് അപേക്ഷ ക്ഷണിച്ചു.

ചിറയിൻകീഴ്, വർക്കല താലൂക്കുകളിൽ താമസിക്കുന്നവർ ആറ്റിങ്ങൽ സിവിൽ സ്റ്റേഷന്റെ നാലാം നിലയിൽ പ്രവർത്തിക്കുന്ന ജില്ലാ പ്രൊബേഷൻ ഓഫീസിലും (ഫോൺ: 0470 262 5456) ജില്ലയിലെ മറ്റു താലൂക്കുകളിൽ താമസിക്കുന്നവർ പൂജപ്പുരയിലെ ജില്ലാ പ്രൊബേഷൻ ഓഫീസിലുമാണ് (ഫോൺ: 0471 2342786) അപേക്ഷ സമർപ്പിക്കേണ്ടത്. അപേക്ഷാ ഫോം swd.kerala.gov.in എന്ന വെബ്‌സൈറ്റിലും തിരുവനന്തപുരം, ആറ്റിങ്ങൽ ജില്ലാ പ്രൊബേഷൻ ഓഫീസിലും ലഭിക്കും.

അവസാന തീയതി ജൂലായ് 5. ധനസഹായത്തിനു തിരഞ്ഞെടുക്കപ്പെടുന്ന ഗുണഭോക്താവ് 200 രൂപ മുദ്രപത്രത്തിൽ സാമൂഹ്യനീതി വകുപ്പുമായി മാനദണ്ഡങ്ങൾ സംബന്ധിച്ച കരാറിൽ ഏർപ്പെടണം. ധനസഹായം ഗുണഭോക്താവിന്റെ അക്കൗണ്ട് വഴിയാകും വിതരണം ചെയ്യുകയെന്നും ജില്ലാ പ്രൊബേഷൻ ഓഫീസർ അറിയിച്ചു.