വെള്ളറട: ഓരോരോ ജീവിത പ്രതിസന്ധികൾ തരണം ചെയ്യാനായി കൃഷിയെ ആശ്രയിക്കുന്ന മലയോര കർഷകർക്ക് അവ വിളവെടുക്കാനാകാത്ത അവസ്ഥയാണ്. കാടിറങ്ങിയെത്തുന്ന വന്യമൃഗങ്ങൾ കൃഷിയോരോന്നും നശിപ്പിക്കുമ്പോൾ തകരുന്നത് കർഷകരുടെ സ്വപ്നങ്ങളും പ്രതീക്ഷകളുമാണ്.

വന്യജീവികൾ കർഷകരുടെ വിളകൾ പൂർണമായും നശിപ്പിക്കാൻ തുടങ്ങിയിട്ട് കാലമേറെയായി. ഇവയുടെ ശല്യത്തിന് പരിഹാരം കാണുമെന്ന് അധികൃതരുടെ ഉറപ്പ് പാഴ്വാക്കായി. കാട്ടിൽ നിന്നെത്തുന്ന കൃഷി വ്യാപകമായി നശിപ്പിച്ചിരുന്ന കാട്ടുപന്നിയും വാനരപ്പടയും ഇപ്പോൾ കർഷകരെ കൈകാര്യം ചെയ്യാനും തുടങ്ങി. എക്കർ കണക്ക് കൃഷി ഭൂമികളാണ് മലയോരത്ത് കൃഷിയിറക്കാൻ കഴിയാതെ തരിശിട്ടിരിക്കുന്നത്. കപ്പയും വാഴയും നാളികേരവും പച്ചക്കറിയും മറ്റു പഴവർഗങ്ങളൊന്നും തന്നെ കൃഷി ചെയ്യാൻ കഴിയാത്ത അവസ്ഥയാണ്.

ജീവൻ നൽകി പ്രതിഷേധം

നിരവധി തവണ നിവേദനങ്ങളുമായി കർഷകർ മൃഗസംരക്ഷണ വകുപ്പിനെയും മറ്റും സമീപിച്ചുവെങ്കിലും ഇവയുടെ ശല്യം ഒഴിവാക്കാൻ കാര്യമായ നടപടിയൊന്നും ഉണ്ടായില്ല. ഏതാനും മാസങ്ങൾക്ക് മുമ്പ് വാനരപ്പടയുടെ ശല്യം കാരണം വീട്ടമ്മ ആത്മഹത്യചെയ്തതോടെ കർഷകർക്കിടയിൽ ശക്തമായ പ്രതിഷേധം ഉണ്ടായി. ഇതോടെ കത്തിപ്പാറയിലെയും അമ്പൂരിയിലെയും ചില പ്രദേശങ്ങളിൽ വനം വകുപ്പ് വാനരന്മാരെ പിടികൂടാൻ കൂടുകൾ സ്ഥാപിച്ചു.

എന്നാൽ കാര്യമായ പ്രയോജനം ഉണ്ടായില്ല. കർഷകരെ രക്ഷിക്കാൻ സർക്കാർ കാര്യക്ഷമമായി ഇടപെട്ടില്ലെങ്കിൽ മലയോരത്തെ അവശേഷിക്കുന്ന കൃഷികൾ പോലും നശിക്കുന്ന സാഹചര്യമാണുള്ളത്.

(പ്രതികരണം )

കാട്ടിൽ ആഹാരത്തിനും വെള്ളത്തിനും ക്ഷാമം നേരിടുമ്പോഴാണ് വന്യജീവികൾ കൂട്ടത്തോടെ കർഷകരുടെ കാർഷിക വിളകൾ നശിപ്പിക്കുന്നത്. കാട്ടിനുള്ളിൽ തന്നെ ഇവയ്ക്ക് ആവശ്യമായ ഭക്ഷണവും വെള്ളവും ലഭ്യമാക്കുന്നതിനുള്ള നടപടികൾ വനം വകുപ്പുമായി ബന്ധപ്പെട്ട് ചെയ്തുവരുന്നുണ്ട്.

അതിർത്തി കടന്നു വരാതിരിക്കുന്നതിന് വൻ മതിലുകളും തീർക്കും. വാനരന്മാരെ പിടികൂടാൻ സ്ഥാപിച്ച കൂടുകൾകൊണ്ട് ഉദ്ദേശിച്ച പ്രയോജനം ലഭിക്കാത്ത സാഹചര്യത്തിലാണ് മറ്റുവഴികൾ തേടുന്നത്

---- സി.കെ. ഹരീന്ദ്രൻ എം.എൽ.എ

സർവനാശം

കാട്ടുപന്നികൾ വാഴയും മരിച്ചീനിയും വ്യാപകമായി നശിപ്പികുമ്പോൾ വാനരന്മാർ പഴവർഗങ്ങളും പച്ചക്കറിയും നാളികേരവുമാണ് നശിപ്പിക്കുന്നത്. അത്യാവശ്യം കാപ്പികൃഷിപോലും ചെയ്യാൻ കഴിയുന്നില്ല. കർഷിക മേഖലകളിൽ മുഴുവൻ കൃഷിയും നശിപ്പിക്കുകയാണ് മൃഗങ്ങൾ. നാളികേരത്തിന് ഇപ്പോൾ മലയോരത്തുള്ളവർ മറ്റുള്ള പ്രദേശങ്ങളെ ആശ്രയിക്കേണ്ട അവസ്ഥയാണ്. തെങ്ങിൽ വെള്ളയ്ക്ക പരുവം ആകുന്നതുവരെ വാനരന്മാർ നശിപ്പിക്കുകയാണ്.

പ്രധാന കൃഷികൾ

മരച്ചീനി, വാഴ, തെങ്ങ, മാങ്ങ, പുളി, ചക്ക, പച്ചക്കറിയും മറ്റ് കൃഷികളും