തിരുവനന്തപുരം: ലോക്ക് ഡൗൺ നടപ്പായ മെയ് മാസത്തിൽ സംസ്ഥാനത്തെ സിനിമാ തിയേറ്ററുകൾക്ക് വൈദ്യുതി ഫിക്സഡ് ചാർജ്ജിൽ ഇളവ് നൽകാൻ തീരുമാനിച്ചതായി മുഖ്യമന്ത്രി പിണറായി വിജയൻ അറിയിച്ചു. കൂടാതെ സൗജന്യവൈദ്യുതി പദ്ധതിയിലുള്ള

500 വാട്ട്സ് വരെ കണക്ടഡ് ലോഡ് ഉള്ള ഗാർഹിക ഉപഭോക്താക്കൾക്ക് 30 യൂണിറ്റ് വരെ സൗജന്യമായി നൽകും. നിലവിൽ ഇത് 20 യൂണിറ്റ് ആണ്. കൂടാതെ

1000 വാട്ട്സ് വരെ കണക്ടഡ് ലോഡുള്ള ബി.പി.എൽ കുടുംബങ്ങൾക്ക് നൽകുന്ന യൂണിറ്റിന് ഒന്നരരൂപ നിരക്കിലുള്ള സൗജന്യവൈദ്യുതി നിരക്ക് 50യൂണിറ്റ് വരെയുള്ളവർക്ക് വ്യവസ്ഥകൾക്ക് വിധേയമായി നൽകും. നിലവിൽ ഇത് 40 യൂണിറ്റ് ആണ്.

വാണിജ്യ / വ്യാവസായിക ഉപഭോക്താക്കൾക്ക് മെയ് മാസത്തെ ഫിക്സഡ് / ഡിമാന്റ് ചാർജ്ജിൽ 25 ശതമാനം ഇളവ് നൽകും. സിനിമാ തിയേറ്ററുകൾക്ക് മെയ് മാസത്തെ ഫിക്സഡ് / ഡിമാന്റ് ചാർജ്ജിൽ 50 ശതമാനം ഇളവ് നൽകും. ഈ വിഭാഗങ്ങൾക്ക് ഫിക്സഡ് / ഡിമാന്റ് ചാർജ്ജിൽ നൽകുന്ന ഇളവുകൾ കഴിച്ച് ബാക്കിയുള്ള തുക അടയ്ക്കുന്നതിന് 2021 സെപ്തംബർ വരെ മൂന്ന് പലിശ രഹിത തവണകൾ അനുവദിക്കും. ഈ ഉപഭോക്തൃ വിഭാഗങ്ങൾ പ്രസ്തുത കാലയളവിലെ ബിൽ തുക ഭാഗികമായോ പൂർണ്ണമായോ അടച്ചിട്ടുണ്ടെങ്കിൽ തുടർന്നുള്ള ബില്ലുകളിൽ ക്രമപ്പെടുത്തി നൽകാനും തീരുമാനിച്ചു.