ചേർത്തല: മനുഷ്യന്റെ ഏ​റ്റവും വലിയ സമ്പത്ത് ആരോഗ്യമാണെന്ന് എല്ലാവരെയും ബോദ്ധ്യപ്പെടുത്തിയത് കൊവിഡ് കാലഘട്ടമാണെന്ന് കൃഷി മന്ത്റി പി. പ്രസാദ് പറഞ്ഞു. ഇന്ത്യൻ റെഡ്‌ക്രോസ് സൊസൈ​റ്റി ചേർത്തല താലൂക്ക് കമ്മിറ്റി കടക്കരപ്പള്ളി പ്രാഥമികാരോഗ്യ കേന്ദ്രത്തിന് ഓക്സിജൻ കോൺസെൻട്രേ​റ്റർ കൈമാറുന്ന ചടങ്ങ് ഉദ്ഘാടനം ചെയ്യുകയായിരുന്നു അദ്ദേഹം.

പദവിയും പണവും വസ്തുക്കളും സ്വർണ്ണവും ഒന്നുമല്ല മനുഷ്യന്റെ സമ്പത്ത്. ഇതിനൊന്നിനും കൊവിഡിനെ തടയാനാവില്ലെന്ന് നമുക്ക് ബോദ്ധ്യമായി. ആരോഗ്യം സമ്പത്താക്കി കാത്തുസൂക്ഷിക്കുകയാണ് ഈ കൊവിഡ് കാലഘട്ടത്തിൽ ആവശ്യമെന്നും മന്ത്റി പറഞ്ഞു. കടക്കരപ്പള്ളി ഗ്രാമ പഞ്ചായത്ത് മുഴുവൻ വീടുകളിലും നൽകുന്ന മാസ്കുകളുടെയും സാനി​ട്ടൈസറിന്റെയും വിതരണ ഉദ്ഘാടനവും മന്ത്റി നിർവഹിച്ചു. പഞ്ചായത്ത് കോൺഫറൻസ് ഹാളിൽ നടന്ന ചടങ്ങിൽ
റെഡ്‌ക്രോസ് താലൂക്ക് ചെയർമാൻ അഡ്വ.കെ.രാധാകൃഷ്ണൻ അദ്ധ്യക്ഷത വഹിച്ചു. കടക്കരപ്പള്ളി ഗ്രാമ പഞ്ചായത്ത് പ്രസിഡന്റ് ജയിംസ് ചിങ്കുതറ ഓക്‌സിജൻ കോൺസെൻട്രേറ്റർ മന്ത്റിയിൽ നിന്നു ഏ​റ്റുവാങ്ങി. റെഡ്‌ക്രോസ് ജില്ലാ വൈസ് ചെയർമാൻ ഐസക് മാടവന മുഖ്യപ്രഭാഷണം നടത്തി. റെഡ്‌ക്രോസ് താലൂക്ക് സെക്രട്ടറി വിനോദ് കുമാർ, തൈക്കൽ സത്താർ, സെറിൻ ഐസക്, അഡ്വ. രാജഗോപാൽ, സുരേഷ് മാമ്പറമ്പിൽ,സതി അനിൽ കുമാർ, എൽ.മിനി, ടി.കെ. സത്യാനന്ദൻ,എസ്. ഷിജി,പി.ഡി.ഗഗാറിൻ,സതിദേവി, ബീന എന്നിവർ സംസാരിച്ചു.