ചേർത്തല: വയലാറിലെ എസ്.ഡി.പി.ഐ ആക്രമണത്തിൽ ആർ.എസ്.എസ് പ്രവർത്തകൻ നന്ദു കൃഷ്ണ വെട്ടേ​റ്റു മരിച്ച കേസിൽ രണ്ട് പേർ കൂടി പിടിയിൽ. കുത്തിയതോട് പഞ്ചായത്ത് ഏഴാം വാർഡിൽ ചിറയിൽ സിയാദ് (36), പൂച്ചാക്കൽ ദാരുൾ സലാം രാജ (45) എന്നിവരാണ് അറസ്​റ്റിലായത്. 12-ാം പ്രതിയാണ് സിയാദ്. പ്രതികൾക്ക് സഹായം ചെയ്തതിനാണ് രാജയെ അറസ്​റ്റ് ചെയ്തതെന്നു പൊലീസ് പറഞ്ഞു. സിയാദിനെ കോടതി റിമാൻഡ് ചെയ്തു. രാജയ്ക്ക് ജാമ്യം ലഭിച്ചു. ഡിവൈ എസ്.പി വിനോദ് പിള്ള, സി.ഐ പി. ശ്രീകുമാർ, എ.എസ്.ഐ മനോജ് കൃഷ്ണൻ, സി.പി.ഒമാരായ രജീഷ്,ജിതിൻ,പ്രവീഷ്,ശരത് എന്നിവരുടെ നേതൃത്വത്തിലാണ് പ്രതികളെ അറസ്​റ്റ് ചെയ്തത്. കഴിഞ്ഞ ഫെബ്രുവരി 24 ന് രാത്രിയായിരുന്നു വയലാർ നാഗംകുളങ്ങരയിൽ നന്ദു കൃഷ്ണ വെട്ടേ​റ്റ് മരിച്ചത്. സുഹൃത്ത് കെ.എസ്. നന്ദുവിന്റെ കൈക്ക് വെട്ടേറ്റിരുന്നു.