ചാരുംമൂട് : ചാരുംമൂട് ടൗണിലെ സിഗ്നൽ ലൈറ്റുകൾ വീണ്ടും തെളിഞ്ഞു. ഇന്നലെയാണ് സിഗ്നൽ ലൈറ്റുകളുടെ തകരാറ് പരിഹരിച്ചത്.

കൊല്ലം - തേനി ദേശീയ പാതയും കായംകുളം - പുനലൂർ സംസ്ഥാന പാതയും സംഗമിക്കുന്ന തി​രക്കേറി​യ ചാരുംമൂട് ടൗണിന്റെ നാലു ഭാഗത്തേക്കുമുള്ള സിഗ്നൽ ലൈറ്റുകൾ മി​ക്കവയും തകരാറിലായിരുന്നു.

അപകട സൂചന നൽകുന്ന ചുവന്ന ലൈറ്റുകൾ മിക്കതും കണ്ണടച്ചിരുന്നു. ചില ലൈറ്റുകളാവട്ടെ ഒരു വര പോലെ മാത്രമാണ് തെളിഞ്ഞിരുന്നത്.

ഈ അവസ്ഥ യാത്രക്കാരിൽ ആശങ്കയ്ക്കും അപകടങ്ങൾക്കും കാരണമാകുമെന്നത് കഴിഞ്ഞ ദിവസം കേരളകൺ​മുദി​ റിപ്പോർട്ട് ചെയ്തിരുന്നു.

ഇന്നലെ രാവിലെ സിഗ്നൽ ലൈറ്റുകൾ പൂർണമായും തകരാറി​ലായി​. തുടർന്ന് പൊലീസ് ഗതാഗതം നിയന്ത്രിച്ചു. ഉച്ചയോടെ കെൽട്രോണിൽ നിന്നും ജീവനക്കാരെത്തിച്ചേർന്നു. വൈകുന്നേരത്തോടെ തകരാർ പൂർണമായും പരിഹരിക്കുകയായി​രുന്നു. ചില ലൈറ്റുകളുടെ തകരാറ് പരിഹരിക്കുകയും മറ്റ് ചിലത് മാറ്റി പുതിയത് സ്ഥാപിച്ചതായും ജീവനക്കാർ പറഞ്ഞു.

ലൈറ്റുകളുടെ തകരാറ് പരിഹരിച്ചതോടെ ടൗണിലെ അപകട ഭീഷണി ഒഴിവായി.

2013-14ൽ കൊടിക്കുന്നിൽ സുരേഷ് എം.പിയുടെ പ്രാദേശിക വികസന ഫണ്ടിൽ നിന്നും 999209 രൂപ ചെലവഴിച്ചാണ് ടൗണിൽ സിഗ്നൽ ലൈറ്റ് സ്ഥാപിച്ചത്.