ന്യൂഡൽഹി: കേന്ദ്ര സർക്കാരിന്റെ പുതിയ ഐ.ടി ചട്ടങ്ങളുടെ ഭരണഘടനാ സാധുത ചോദ്യം ചെയ്ത് വാർത്താ ഏജൻസിയായ പി.ടി.ഐ നൽകിയ പരാതിയുടെ അടിസ്ഥാനത്തിൽ ഡൽഹി ഹൈക്കോടതി കേന്ദ്ര ഐ.ടി. മന്ത്രാലയത്തോട് വിശദീകരണം തേടി. ചീഫ് ജസ്റ്റിസ് ഡി.എൻ പട്ടേൽ, ജസ്റ്റിസ് ജെ.ആർ മിഥ എന്നിവരുടെ ബെഞ്ചാണ് നോട്ടീസ് നൽകിയത്.

കേന്ദ്ര ഐ.ടി. നിയമത്തിനെതിരേ മറ്റ് ഓൺലൈൻ സ്ഥാപനങ്ങൾ നൽകിയ ഹർജിക്കൊപ്പം പി.ടി.ഐയുടെ ഹർജി പരിഗണിക്കും. വാർത്തകൾ റിപ്പോർട്ട് ചെയ്യുന്ന ഡിജിറ്റൽ മാദ്ധ്യമങ്ങൾക്ക് കൂച്ചു വിലങ്ങിടുന്നതിന്റെ ഭാഗമാണ് കേന്ദ്ര ഐടി നിയമമെന്ന് പി.ടി.ഐ ഹർജിയിൽ പറയുന്നു. ഐ.ടി. നിയമങ്ങൾ മൂലം തങ്ങൾ നിരീക്ഷിക്കപ്പെടുകയാണെന്ന തോന്നൽ മാദ്ധ്യമ സ്ഥാപനങ്ങൾക്ക് ഉണ്ടാകുമെന്നും ഭയത്തിന് ഇടയാക്കുമെന്നും ഇത് മൗലിക അവകാശത്തിന്റെ ലംഘനമാണെന്നും ഹർജിയിലുണ്ട്.