കോലഞ്ചേരി: പ്രൈമറി ക്ലാസുകളിലെ കുട്ടികളിൽ വായനാശീലം വർദ്ധിപ്പിക്കുന്നതിനും കൊവിഡ് കാലത്തെ അടച്ചിടൽമൂലം കുട്ടികളിൽ ഉണ്ടായ മാനസിക പിരിമുറുക്കം ലഘൂകരിക്കുന്നതിനും സെന്റ് പീ​റ്റേഴ്‌സ് കോളേജിലെ സാമ്പത്തിക ശാസ്ത്ര വിഭാഗം അദ്ധ്യാപകരും വിദ്യാർത്ഥികളും 'കഥപറയാൻ ഞങ്ങളും കേട്ടരിക്കാൻ നിങ്ങളും ' പദ്ധതിയുമായി രംഗത്ത്. ഒന്നും രണ്ടും വർഷ ബിരുദ വിദ്യാർത്ഥികൾ അവർ വായിച്ച പുസ്തകങ്ങളിലെ കഥകളെയും കഥാ പത്രങ്ങളെയും കുട്ടികൾക്കും രക്ഷിതാക്കൾക്കും മുന്നിൽ പരിചയപ്പെടുത്തുകയും തുടർന്ന് വായിച്ച് കേട്ട പുസ്തകവുമായി ബന്ധപ്പെട്ട് ക്വിസ് മത്സരം നടത്തുന്നതുമാണ് പദ്ധതി. പു​റ്റുമാനൂർ, പായിപ്ര, കിഴുമുറി, കടാതി എന്നീ വിദ്യാലയങ്ങളിൽ ഓൺലൈൻ പ്ലാ​റ്റ് ഫോമിലൂടെയാണ് വായന പക്ഷാചരണത്തിന്റെ ഭാഗമായുള്ള ഈ വ്യത്യസ്ത പ്രവർത്തനം നടത്തിയത്. പ്രോഗ്രാം കോഓർഡിനേ​റ്റർ ഡോ ജിജി ഏലിയാസിന്റെ നേതൃത്വം നൽകി. സെന്റ് പീ​റ്റേഴ്‌സ് കോളേജ് പ്രിൻസിപ്പൽ ഡോ.ഷാജു വർഗീസ് ഉദ്ഘാടനം നിർവഹിച്ചു. ഡോ.പിയ മാത്യു, രേണു സൂസൻ സാമുവൽ, വിദ്യാർത്ഥികളായ ഷീന ആൻ രാജൻ, ഭാഗ്യലക്ഷ്മി, രമേഷ് ,അശ്വതി ഉദയകുമാർ എന്നിവർ പങ്കെടുത്തു.