പെരുമ്പാവൂർ: എസ്.എൻ.ഡി.പി യോഗം നേതാവും കുന്നത്തുനാട് യൂണിയൻ സ്ഥാപകനുമായ ഇ.വി. കൃഷ്ണന്റെ സ്മരണാർത്ഥം യൂണിയൻ ആസ്ഥാനത്ത് അർദ്ധകായ പ്രതിമ സ്ഥാപിക്കുമെന്ന് യൂണിയൻ ചെയർമാൻ കെ.കെ കർണൻ പറഞ്ഞു. 51-ാം മത് ഇ.വി കൃഷ്ണൻ അനുസ്മരണം ഉദ്ഘാടനം ചെയ്യുകയായിരുന്നു അദ്ദേഹം. ഇ.വിയുടെ ജീവിതം മാതൃകയാണ്. ഗുരുദേവ പ്രസ്ഥാനങ്ങൾക്കുവേണ്ടി ജീവിച്ച ഇ.വിയുടെ സ്മരണകൾ വെളിച്ചമാകണമെന്നും അദ്ദേഹം പറഞ്ഞു. യൂണിയൻ അഡ്മിനിസ്ട്രേറ്റീവ് കമ്മിറ്റിഅംഗം എം.എ. രാജു അദ്ധ്യക്ഷനായി. കെ.എൻ. സുകുമാരൻ, യൂത്ത്മൂവ്മെന്റ് യൂണിയൻ കൺവീനർ അഭിജിത്ത് ഉണ്ണിക്കൃഷ്ണൻ, വനിതാസംഘം യൂണിയൻ സെക്രട്ടറി ഇന്ദിര ശശി, നളിനി മോഹനൻ എന്നിവർ അനുസ്മരണ സന്ദേശം നൽകി. ഗുരുപൂജ, അനുസ്മരണ പ്രാർത്ഥന, പുഷ്പാർച്ചന എന്നി​വയും നടന്നു.