മൂവാറ്റുപുഴ: ഇടവേളക്കുശേഷം കീച്ചരിപ്പടി-ഇരമല്ലൂർ റോഡിലെ നിരപ്പിൽ വീണ്ടും മാലിന്യം തള്ളൽ. ഞായറാഴ്ച രാത്രിയാണ് പായിപ്ര ഗ്രാമപഞ്ചായത്ത് 11-ാം വാർഡിൽ കീച്ചേരിപ്പടി-ഇരമല്ലൂർ റോഡിലെ നിരപ്പ് റോഡ് സൈഡിൽ മറ്റത്തിൽ എം.കെ.മൈതീന്റെ ഉടമസ്ഥതയിലുള്ള സ്ഥലത്ത് ടോറസിൽ കൊണ്ടുവന്ന് മാലിന്യം നിക്ഷേപിച്ചത്. നേരത്തെ പ്രദേശത്ത് മാലിന്യം നിക്ഷേപിച്ചത് നാട്ടുകാർ പിടികൂടിയിരുന്നു. മാലിന്യം നിക്ഷേപിച്ചവരെ കൊണ്ട് തന്നെ നീക്കം ചെയ്യിപ്പിച്ചത് സമൂഹമാധ്യമങ്ങളിൽ വൈറലായിരുന്നു. ഇതിന് പുറമെ പ്രദേശത്ത് നാട്ടുകാർ നിരീക്ഷണം ശക്തമാക്കുകയും ചെയ്തിരുന്നു. ഇതിനെ തുടർന്ന് കുറച്ച് നാളുകളായി പ്രദേശത്ത് മാലിന്യ നിക്ഷേപിക്കുന്നത് നിലച്ചു. എന്നാൽ ഒരിടവേളയ്ക്ക് ശേഷം ഞായറാഴ്ച അർദ്ധരാത്രി ടോറസ് ലോറിയിൽ ലോഡ് കണക്കിന് മാലിന്യമാണ് കൊണ്ടുവന്ന് തള്ളിയത്. ആശുപത്രി മാലിന്യം അടക്കമുള്ളവയായതിനാൽ വലിയ ദുർഗന്ധവും ഈച്ചയും കൊതുകും മൂലം മാലിന്യത്തിന് സമീപത്തേയ്ക്ക് അടുക്കാൻ പറ്റാത്ത അവസ്ഥയാണ്. തെരുവ് നായകളും കാക്കകളും കൊത്തിവലിച്ച് പ്രദേശത്തെ കിണറുകളിലും റാേഡുകളിലും മാലിന്യം ഇടുന്നതിനാൽ പ്രദേശവാസികളുടെ ജീവിതം ദുരിതത്തിലാണ്. മാലിന്യം കൊണ്ടുവന്ന വാഹനം കണ്ടെത്തുന്നതിനായി സി.സി.ടി.വി കാമറകളും പരിശോധിച്ച് വരികയാണ്.

പൊലീസ് അന്വേഷണം ആരംഭിച്ചു

മാലിന്യം നിക്ഷേപിച്ചവരെ കണ്ടെത്തണമെന്നാവശ്യപ്പെട്ട് എം.കെ.മൈതീൻ മൂവാറ്റുപുഴ പൊലീസിലും പായിപ്ര ഗ്രാമപഞ്ചായത്ത് സെക്രട്ടറിക്കും പരാതി നൽകി. പഞ്ചായത്തിൽ സമീപ പ്രദേശങ്ങളിൽ നിന്ന് കൊണ്ടുവന്ന് മാലിന്യം നിക്ഷേപിക്കുന്നതിനെതിരെ നടപടിയാവശ്യപ്പെട്ട് പഞ്ചായത്ത് സെക്രട്ടറി മൂവാറ്റുപുഴ ഡിവൈ.എസ്.പിക്കും പരാതി നൽകി. മൂവാറ്റുപുഴ പൊലീസ് കേസെടുത്ത് അന്വേഷണം ആരംഭിച്ചു.