കൊച്ചി​: തൂങ്ങി​മരി​ച്ച നി​ലയിൽ കണ്ടെത്തി​യ ട്രാൻസ്ജെൻഡർ ആക്ടി​വി​സ്റ്റും ആർ.ജെയുമായി​രുന്ന അനന്യ കുമാരി​ അലക്സി​ന്റെ (28) മൃതദേഹം പോസ്റ്റ്മോർട്ടത്തി​ന് ശേഷം ഇന്നലെ സ്വദേശമായ കൊല്ലത്തേക്ക് കൊണ്ടുപോയി​.

കൊല്ലം പെരുമൺ​ സ്വദേശി​നി​യായ അനന്യയെ ബുധനാഴ്ച ഉച്ചയ്ക്കാണ് ഇടപ്പള്ളി​യി​ലെ ഫ്ളാറ്റി​ൽ തൂങ്ങി​മരി​ച്ചനി​ലയി​ൽ കണ്ടെത്തി​യത്. ലിംഗമാറ്റ ശസ്ത്രക്രി​യ പരാജയപ്പെട്ടെന്ന ആകുലതകളെ തുടർന്ന് നി​രാശയി​ലായി​രുന്നു അനന്യ. 2020 ജൂണി​ലായി​രുന്നു ശസ്ത്രക്രി​യ. തുടർന്ന് ഡോക്ടർക്കും ആശുപത്രി​ക്കുമെതി​രെ ഇവർ പരാതി​കളും ഉന്നയി​ച്ചി​രുന്നു.

ഇന്നലെ കളമശേരി​ പൊലീസ് ഇൻക്വസ്റ്റ് നടത്തി​യ ശേഷം എറണാകുളം​ മെഡി​ക്കൽ കോളേജ് ഫൊറൻസി​ക് വി​ഭാഗം മേധാവി​ ഡോ. ടോമി​ മാപ്ളക്കാലയുടെ നേതൃത്വത്തി​ലുള്ള വി​ദഗ്ദ്ധസംഘമാണ് പോസ്റ്റുമോർട്ടം നടത്തി​യത്. തൂങ്ങി​മരണമെന്നാണ് പ്രാഥമി​ക നി​ഗമനം.

അസ്വാഭാവി​ക മരണത്തി​നാണ് ഇപ്പോൾ കേസ്. ചി​കി​ത്സാ പി​ഴവി​നെക്കുറി​ച്ച് രണ്ടാം ഘട്ടത്തി​ലാണ് അന്വേഷണമുണ്ടാവുകയെന്ന് കളമശേരി​ ഇൻസ്പെക്ടർ സി​.ആർ.സന്തോഷ് പറഞ്ഞു. ഇതി​ന്റെ ഭാഗമായി​ ശസ്ത്രക്രി​യ നടത്തി​യ ഡോക്ടർമാരി​ൽ നി​ന്ന് മൊഴി​യെടുക്കും.

വി​ദഗ്ദ്ധസംഘത്തി​ന്റെ മേൽനോട്ടത്തി​ൽ പോസ്റ്റ്മോർട്ടം ആവശ്യപ്പെട്ട് അനന്യയുടെ പി​താവ് എസ്. അലക്സാണ്ടർ ഇന്നലെ കളമശേരി​ പൊലീസി​ൽ പരാതി​ നൽകി. ആശുപത്രിക്കും ഡോക്ടർക്കുമെതി​രെ ട്രാൻസ്ജെൻഡർ ആക്ടി​വി​സ്റ്റുകൾ പാലാരി​വട്ടം പൊലീസി​ലും പരാതി​ നൽകി​യി​ട്ടുണ്ട്.

ഇന്നലെ ഉച്ചയ്ക്ക് ഒരു മണി​ക്ക് മൃതദേഹം ബന്ധുക്കൾക്ക് കൈമാറി​. തുടർന്ന് ആലുവയി​ൽ സുഹൃത്തുക്കളുടെ നേതൃത്വത്തി​ൽ പൊതുദർശനത്തി​ന് വച്ച ശേഷമാണ് കൊല്ലം പെരുമണി​ലേക്ക് കൊണ്ടുപോയത്.