കോതമംഗലം: നെല്ലിക്കുഴി ചെറുവട്ടൂർ പ്രദേശങ്ങളിൽ രാത്രികാലങ്ങളിൽ മോഷണം പതിവായി. കഴിഞ്ഞ രണ്ടാഴ്ചയ്ക്കിടെ നിരവധി മോഷണങ്ങളും മോഷണശ്രമങ്ങളും. മോഷ്ടാവിന്റെ സി.സി ടിവി ദൃശ്യങ്ങൾ ചെറുവട്ടൂരിലെ വ്യാപാര സ്ഥാപനത്തിൽ സ്ഥാപിച്ച കാമറയിൽ പതിഞ്ഞിട്ടുണ്ട്.

കഴിഞ്ഞരാത്രി നെല്ലിക്കുഴി കനാൽ പാലത്തുളള പെട്ടിക്കട കുത്തിത്തുറന്ന് ആയിരക്കണക്കിന് രൂപയുടെ സിഗരറ്റുകളും പണവും അടക്കം മോഷ്ടാവ് കവർന്നു.

കഴിഞ്ഞദിവസം കനാൽപാലം ഇലക്ട്രോണിക്സ് സ്ഥാപനത്തിൽനിന്ന് വിലകൂടിയ മൊബൈൽഫോണും പണവും മറ്റ് ഇലക്ട്രിക് ഉപകരണങ്ങളും കവർന്നിരുന്നു. ഒരാഴ്ച മുമ്പ് നെല്ലിക്കുഴി പഞ്ചായത്തുംപടിയിലെ എസ്.ബി.ഐയുടെ എ.ടി. എം കൗണ്ടർ തകർത്ത് പണംകവരാൻ ശ്രമം നടന്നിരുന്നു. കമ്പനിപ്പടിയിലെ പലചരക്കുകട കുത്തിത്തുറന്ന് ആറായിരത്തിലധികം രൂപയും സാധനങ്ങളും കവർച്ചചെയ്തിരുന്നു. അന്നുതന്നെ ചെറുവട്ടൂരിലെ അഞ്ച് വ്യാപാരസ്ഥാപനങ്ങളിൽ മോഷണം നടത്താൻ ശ്രമിക്കുകയും ചില കടകളിൽ നിന്ന് പണവും സാധനങ്ങളും കവരുകയും ചെയ്തു. ചെറുവട്ടൂരിലെ വസ്ത്രവ്യാപാര സ്ഥാപനത്തിൽ കയറാനുളള മോഷ്ടാവിന്റെ ശ്രമങ്ങൾ സി.സി ടിവി ദൃശ്യങ്ങളിലുണ്ട്.

അന്യസംസ്ഥാന തൊഴിലാളികൾ അടക്കം നിരവധി ആളുകൾ നെല്ലിക്കുഴിയിൽ ജോലിചെയ്യുന്നുണ്ട്. പൊലീസ് അന്വേഷണം തുടരുന്നു.