കൊച്ചി: ട്രാൻസ്‌ജെൻഡർ ആക്ടിവിസ്റ്റ് അനന്യകുമാരി അലക്സ് ആത്മഹത്യ ചെയ്ത സംഭവത്തിൽ ആരോപണ വിധേയനായ സ്വകാര്യ ആശുപത്രിയിലെ ഡോക്ടറുടെ മൊഴി അന്വേഷണ സംഘത്തിന് രേഖപ്പെടുത്താനായില്ല. ഇന്നലെ മൊഴി എടുക്കാനായിരുന്നു തീരുമാനം. അനന്യ ലിംഗമാറ്റ ശസ്ത്രക്രി​യ നടത്തി​യ ആശുപത്രിയിൽ നിന്നടക്കം ലഭിച്ച മെഡിക്കൽ രേഖകളുടെ വി​ശകലനം പൂർത്തിയാകാത്തതിനാലാണ് മൊഴിയെടുപ്പ് മാറ്റിയത്. പോസ്റ്റ്‌മോർട്ടം നടത്തിയ കളമശേരി​ മെഡി​ക്കൽ കോളേജ് സംഘവുമായി ആശയവി​നി​മയം നടത്തി​യ ശേഷം ഇന്ന് മൊഴി​യെടുത്തേക്കും.

തുടർന്ന് അനന്യയുടെ സുഹൃത്തുക്കളെയും ചോദ്യം ചെയ്യുമെന്ന് കളമശേരി എസ്.എച്ച്.ഒ പി.ആർ. സന്തോഷ് പറഞ്ഞു.

ലിംഗമാറ്റ ശസ്ത്രക്രിയയിൽ പിഴവുണ്ടായെന്ന് അനന്യ വെളിപ്പെടുത്തി​യി​രുന്നു. ശസ്ത്രക്രിയ നടത്തിയ ചിലയിടങ്ങളിൽ ഉണങ്ങാത്ത മുറിവുണ്ടായതായി പോസ്റ്റുമോർട്ടത്തിൽ കണ്ടെത്തിയിരുന്നു.