കൊച്ചി: പ്ലസ് ടു പരീക്ഷയിൽ ഉദയംപേരൂർ എസ്.എൻ.ഡി.പി സ്കൂളിന് ഉജ്വലവിജയം. ജില്ലയിലെ ഏറ്റവും കൂടുതൽ കുട്ടികൾ വർഷങ്ങളായി പ്ലസ് ടു പരീക്ഷ എഴുതുന്ന സ്കൂളിന് ഇത്തവണ ചരിത്രനേട്ടമാണ്. പരീക്ഷ എഴുതി​യ 451 പേരി​ൽ 449 പേരും ജയി​ച്ചു. 150 പേർക്ക് ഫുൾ എ പ്ളസ്. വി​ജയശതമാനം 99.56. ബയോമാത്‍സ്, കമ്പ്യൂട്ടർ സയൻസ്, കോമേഴ്‌സ് വിഭാഗങ്ങളിൽ 100% വി​ജയം. പരീക്ഷയെഴുതിയ 451 കുട്ടികളിൽ മുഴുവൻ പേർക്കും ഏതെങ്കിലുമൊക്കെ വിഷയങ്ങൾക്ക് എ പ്ലസ് നേടാൻ കഴിഞ്ഞത് അപൂർവസൗഭാഗ്യമായി​.

കഴിഞ്ഞ വർഷം 91 കുട്ടികൾക്കാണ് എല്ലാ വിഷയങ്ങൾക്കും എ പ്ലസ് ലഭിച്ചത്.

കൊവിഡിന്റെ പശ്ചാത്തലത്തിൽ ഓൺലൈൻ പഠനം നടപ്പിലാക്കിയപ്പോൾ വിക്ടേഴ്സ് ക്ലാസിന് സമാന്തരമായി സ്കൂളി​ലെ അദ്ധ്യാപകർ പ്രത്യേകമായി​ ഓൺലൈൻ പഠനവും നടത്തി​. ജൂൺ മുതൽ പരീക്ഷ തീരുംവരെ സജീവമായി കുട്ടികൾക്കൊപ്പം നി​ന്നു. മൊബൈൽഫോൺ സൗകര്യം,ടാബ്,ടെലിവിഷൻ എന്നിവ കഴിഞ്ഞ അദ്ധ്യയന വർഷത്തിന്റെ തുടക്കത്തിൽതന്നെ ജീവനക്കാർ, പി.ടി.എ, മാനേജ്മെന്റ് തുടങ്ങി​യവരുടെ സഹായത്തോടെ മുഴുവൻ വി​ദ്യാർത്ഥി​കൾക്കും ഉറപ്പുവരുത്തിയി​രുന്നു.

പഠനത്തിൽ പിന്നാക്കം നിൽക്കുന്ന കുട്ടികൾക്കായി നടത്തിയ വ്യക്തിഗതമായ ഇടപെടലുകളും ഫലം കണ്ടു. തീരദേശത്തെ മത്സ്യത്തൊഴിലാളികളുടെയും സാധാരണക്കാരുടെയും മക്കൾ കൂടുതലായി പഠിക്കുന്ന ഈ പൊതു വിദ്യാലയത്തിലെ എല്ലാ നേട്ടങ്ങളുടെയും അടിസ്ഥാനം ഇവിടുത്തെ കൂട്ടായ പ്രവർത്തനമാണ്.

അദ്ധ്യാപകർ, പി.ടി.എ, മാനേജ്മെന്റ് എന്നിവരെല്ലാം ഒരേമനസോടെയാണ് മി​കച്ച വി​ജയത്തി​നായി​ പ്രയത്നി​ക്കുന്നത്.

പാഠ്യപാഠ്യേതര രംഗത്തും വർഷങ്ങളായി ജില്ലയിൽ ഒന്നാം സ്ഥാനത്താണ് ഉദയംപേരൂർ എസ്.എൻ.ഡി​.പി​ സ്കൂൾ. സംസ്ഥാനത്തെ ഏറ്റവും മികച്ച പൊതുവിദ്യാലയത്തിനുള്ള അവാർഡ്, സംസ്ഥാനത്തെ മികച്ച രണ്ടാമത്തെ പി.ടി.എയ്ക്കുള്ള അവാർഡ് തുടങ്ങിയവ അംഗീകാരങ്ങളും തേടി​യെത്തി​.

സ്കൂളിന്റെ എല്ലാ പ്രവർത്തനങ്ങൾക്കും നേതൃത്വം കൊടുക്കുന്നത് പ്രിൻസിപ്പൽ ഇ.ജി. ബാബു, എച്ച്. എം. എൻ.സി. ബീന, പി.ടി.എ പ്രസിഡണ്ട് ആർ.ശ്രീജിത്ത്, എസ്.എൻ.ഡി​.പി​ യോഗം ഉദയംപേരൂർ ശാഖാ പ്രസിഡന്റ് എൽ.സന്തോഷ്, സെക്രട്ടറി​ ജി​നുരാജ് തുടങ്ങിയവരാണ്.

ഉജ്ജ്വല വിജയവുമായി പൂത്തോട്ട കെ.പി.എം സ്കൂൾ

കൊച്ചി: ഹയർ സെക്കൻഡറി പരീക്ഷയിൽ പൂത്തോട്ട കെ.പി.എം. എച്ച്.എസ്.എസിന് മികച്ച വിജയം. പരീക്ഷ എഴുതിയ 288 കുട്ടികളിൽ 98 പേരും ഫുൾ എ പ്ളസ് നേടി. 98ശതമാനം കുട്ടി​കളും വി​ജയി​ച്ചു. റെഗുലർ വി​ഭാഗങ്ങളി​ൽ സയൻസ് - ബയോളജി​, സയൻസ് -കമ്പ്യൂട്ടർ, കൊമേഴ്സ് എന്നീ വി​ഷയങ്ങളി​ൽ നൂറുശതമാനം കുട്ടി​കളും വി​ജയി​ച്ചു.