മറയൂർ: മറയൂരിൽ രണ്ട് സ്വകാര്യ സ്ഥലങ്ങളിൽ നിന്നായി ശനിയാഴ്ച രാത്രി ചന്ദന മരങ്ങൾ വെട്ടികടത്തി. മൈക്കിൾ ഗിരി ഭാഗത്ത് മറയൂർ സർവീസ് സഹകരണ ബാങ്കിന്റെ ഉടമസ്ഥതയിലുള്ള സ്ഥലത്ത് നിന്ന മപ്പലകയിൽ വീട്ടിൽ ബേബി തോമസിന്റെ കൃഷി സ്ഥലത്ത് നിന്നുള്ള ചന്ദനമരങ്ങളാണ് മോഷണം പോയത്. രാവിലെ കൃഷിയിടത്തിലേക്ക് പോയവരാണ് ചന്ദന മരങ്ങൾ വെട്ടികടത്തിയ വിവരം അറിയുന്നത്. സഹകരണ ബാങ്ക് അധികൃതരും കൃഷി ഭൂമിയുടെ ഉടമയും കാന്തല്ലൂർ ഫോറസ്റ്റ് സ്റ്റേഷനിൽ വിവരം അറിയിച്ചു. തുടർന്ന് സ്ഥലത്തെത്തി പരിശോധന നടത്തിയ വനംവകുപ്പ് മോഷണം സ്വകാര്യ ഭൂമിയിൽ നിന്നായതിനാൽ അന്വേഷണ ചുമതല പൊലീസിന് കൈമാറി. മറയൂർ പൊലീസ് അന്വേഷണം ആരംഭിച്ചു. മൂന്ന് ലക്ഷം രൂപയോളം വിലമതിക്കുന്ന ചന്ദന മരങ്ങളാണ് മോഷണം പോയത്.