പള്ളിവാസൽ: കാത്തിരിപ്പിനൊടുവിൽ ചെങ്കുളം പമ്പ് ഹൗസ് യാഥാർത്ഥ്യമായി. സംസ്ഥാനത്തെ വൈദ്യുതോല്പാദനത്തിൽ പ്രതിവർഷം 70 ദശലക്ഷം യൂണിറ്റ് അധികമായി ഉല്പാദിപ്പിക്കാൻ കഴിയുന്ന ചെങ്കുളം പമ്പ്ഹൗസാണ് ഇന്നലെ പ്രവർത്തനമാരംഭിച്ചത്. പ്രവർത്തന ഉദ്ഘാടനം വൈദ്യുതി മന്ത്രി കെ. കൃഷ്ണൻകുട്ടി നിർവ്വഹിച്ചു . പള്ളിവാസൽ പഞ്ചായത്തിലെ ചിത്തിരപുരത്താണ് ചെങ്കുളം പമ്പ് ഹൗസ് നിർമ്മിച്ചിട്ടുള്ളത്. പള്ളിവാസൽ ജലവൈദ്യുത പദ്ധതിയിൽ നിന്നും ഉത്പാദനം കഴിഞ്ഞെത്തുന്ന ജലം പമ്പ് ചെയ്തു വീണ്ടും വൈദ്യുതോല്പാദനം നടത്തുക വഴിയാണ് അധിക വൈദ്യുതി ലഭിക്കുന്നത്.1400 കിലോവാട്ട് ശേഷിയുള്ള മൂന്നു പമ്പുകളാണ് പുതുതായി സ്ഥാപിച്ചത്. 26 കോടി ചിലവിൽ 2016 ൽ കരാർ ഒപ്പിട്ട പദ്ധതി 2018 ലേയും 2019 ലേയും പ്രളയം, കൊവിഡ് മഹാമാരി, മറ്റ് പാരിസ്ഥിതിക ബുദ്ധിമുട്ടുകൾ തുടങ്ങി നിരവധി പ്രതിസന്ധികളെ അതിജീവിച്ചാണ് പൂർത്തികരിച്ചത്.നിർമ്മാണം പൂർത്തീകരിച്ചത്.

കുറഞ്ഞ ചിലവിൽ വൈദ്യുതി ഉത്പാദിപ്പിക്കാൻ ജലവൈദ്യുതി പദ്ധതികൾ സഹായിക്കുമെന്ന് മന്ത്രി പറഞ്ഞു. അഡ്വ. എ രാജ എം എൽ എ അദ്ധ്യക്ഷത വഹിച്ച സമ്മേളനത്തിൽ അഡ്വ. ഡീൻ കുര്യാക്കോസ് എം പി മുഖ്യാതിഥിയായി. കെ എസ് ഇ ബി സിവിൽ ജനറേഷൻ ഡയറക്ടർ ജി രാധാകൃഷ്ണൻ, ഇല്ക്ട്രിക്കൽ ജനറേഷൻ ഡയറക്ടർ ആർ സുകു, ജില്ലാ പഞ്ചായത്ത് പ്രസിഡന്റ് ജിജി കെ. ഫിലിപ്പ്, അടിമാലി ബ്ലോക്ക് പഞ്ചായത്ത് പ്രസിഡന്റ് സോമൻ ചെല്ലപ്പൻ പങ്കെടുത്തു.