പുതുപ്പരിയാരം: പ്രാഥമിക സഹകരണ സംഘങ്ങളിലെ അംഗങ്ങളുടെ കുട്ടികൾക്ക് ഓൺലൈൻ പഠനാവശ്യത്തിനുള്ള മൊബൈൽ ഫോൺ വാങ്ങുന്നതിനായി പലിശ രഹിത വായ്പാ പദ്ധതിയായ വിദ്യാ തരംഗിണിയുടെ ഉദ്ഘാടനം പുതുപ്പരിയാരം സഹകരണ ബാങ്കിൽ നടത്തി. ആദ്യ അപേക്ഷകയായ അംഗത്തിന് വായ്പാ പദ്ധതിയിൽ ഉൾപെടുത്താതെ സൗജന്യമായി മൊബൈൽ ഫോൺ ബാങ്ക് പ്രസിഡന്റ് അഡ്വ. ജോർജ് മാത്യു കാരാമയിൽ കൈമാറി. വിദ്യാ തരംഗിണി വായ്പാ പദ്ധതിയുടെ ഉദ്ഘാടനം ബാങ്ക് ഭരണ സമിതിയംഗം ബോസ് തളിയംചിറ നിർവഹിച്ചു. സംഘം ഓഡിറ്റർ യു.എം. ഷാജി, സെക്രട്ടറി ജെൻസി മാത്യു എന്നിവർ പ്രസംഗിച്ചു. കൊവിഡ് പശ്ചാത്തലത്തിൽ ബിസിനസുകാർക്ക് ആശ്വാസം നൽകുന്നതിനായി കുറഞ്ഞ പലിശനിരക്കിൽ ബിസിനസ് പ്രമോട്ടിംഗ് വായ്പകൾ ആരംഭിച്ചതായും ബാങ്ക് പ്രസിഡന്റ് അഡ്വ. ജോർജ് മാത്യു കാരാമയിൽ അറിയിച്ചു.