തൊടുപുഴ: മലങ്കര അണക്കെട്ടിന്റെ ആറ് ഷട്ടറുകളും ഒരു മീറ്റർ വീതം തുറക്കാൻ സാദ്ധ്യതയുണ്ടെന്നും തൊടുപുഴ, മൂവാറ്റുപുഴ ആറുകളുടെ തീരപ്രദേശങ്ങളിൽ താമസിക്കുന്നവർ ജാഗ്രത പാലിക്കണമെന്നും എംവിഐപി അധികൃതർ അറിയിച്ചു. ഇത് സംബന്ധിച്ച് ജില്ലാ കളക്ടർ നിർദ്ദേശം നൽകിയിട്ടുണ്ട്. ഡാമിലെ ജലനിരപ്പ് നിയന്ത്രിച്ച് നിർത്തുന്നതിനായി നിലവിൽ ആറ് ഷട്ടറുകളും 70 സെ.മീറ്റർ വീതം തുറന്ന് വെള്ളം പുറത്തേക്ക് ഒഴുക്കുന്നുണ്ട്. മൂലമറ്റം വൈദ്യുതി നിലയത്തിൽ നിന്നുള്ള ഉൽപ്പാദനം പരമാവധിയിലേക്ക് എത്തിച്ചതിനെ തുടർന്ന് മലങ്കരയിൽ ജലനിരപ്പ് ഉയരുന്നുണ്ട്. ഇതിന് പുറമേ വൃഷ്ടി പ്രദേശത്ത് കനത്ത മഴ തുടരുന്നതിനാൽ ഡാമിലേക്കുള്ള നീരൊഴുക്ക് കൂടി. കനത്ത മഴയുടെ പശ്ചാത്തലത്തിൽ ജില്ലയിൽ രണ്ട് ദിവസത്തേക്ക് ഓറഞ്ച് അലർട്ട് പ്രഖ്യാപിച്ചിട്ടുണ്ട്. നിലവിൽ ഡാമിലെ ജലനിരപ്പ് 39.86 മീറ്ററാണ്. അണക്കെട്ടിന്റെ പരമാവധി സംഭരണ ശേഷി 42 മീറ്ററാണ്.