പീരുമേട്: ഭക്ഷ്യസുരക്ഷാ വിഭാഗവും ഫിഷറീസ് വകുപ്പും സംയുക്തമായി മത്സ്യക്കടകളിൽ നടത്തിയ പരിശോധനയിൽ ഉപയോഗശൂന്യമായ 51 കിലോ മീൻ പിടികൂടി. പീരുമേട്,​ കുമളി,​ അണക്കര,​ ചെളിമട,​ വണ്ടിപ്പെരിയാർ എന്നിവിടങ്ങളിൽ ഇന്നലെ നടത്തിയ പരിശോധനയിലാണ് 47 കിലോ പച്ചമീനും നാല് കിലോ ഉണക്കമീനും പിടികൂടി നശിപ്പിച്ചത്. ചീഞ്ഞതും അമോണിയയുടെ അംശമുള്ളതുമായ അയല,​ മണങ്ങ്,​ ഏട്ടക്കൂരി,​ കൊഴുവ എന്നീ പച്ച മീനുകളാണ് കണ്ടെത്തിയത്. ഫംഗസ് ബാധയേറ്റ കോല,​ വാള,​ കതിരാൻ എന്നീ ഉണക്കമീനുകളും നാല് കിലോയിലേറെ പിടികൂടി. 13 കടകളിൽ നിന്നായി ആകെ 50 സാമ്പിളുകളാണ് പരിശോധിച്ചത്. മോശം മീൻ പിടികൂടിയ കടകൾക്ക് നോട്ടീസ് നൽകി. ഫിഷറീസ് വകുപ്പ് ജില്ലാ അസി. ഡയറക്ടർ കണ്ണൻ,​ പീരുമേട് ഭക്ഷ്യസുരക്ഷാ വിഭാഗം ആഫീസർ പ്രശാന്ത് പി,​ തൊടുപുഴ ആഫീസർ എം.എൻ. ഷംസിയ എന്നിവരുടെ നേതൃത്വത്തിലായിരുന്നു പരിശോധന. മീനിൽ അമോണിയ ചേർക്കുന്ന മൊത്തക്കച്ചവട സ്ഥാപനങ്ങളിലും വരും ദിവസങ്ങളിൽ പരിശോധന നടത്തുമെന്ന് ഉദ്യോഗസ്ഥർ അറിയിച്ചു.