തൊടുപുഴ: ജില്ലാ ലീഗൽ സർവീസസ് അതോറിറ്റിയുടെ ആഭിമുഖ്യത്തിൽ ജില്ലയിലെമ്പാടും നടക്കുന്ന സ്ത്രീധന വിരുദ്ധ പ്രചാരണത്തിന്റെ ഭാഗമായി തൊടുപുഴ താലൂക്ക് ലീഗൽ സർവീസസ് കമ്മിറ്റിയുടെ നേതൃത്വത്തിൽ തൊടുപുഴ ബ്ലോക്ക് പഞ്ചായത്തുമായി സഹകരിച്ച് വെബിനാർ നടത്തി.
ജില്ലാ അഡീഷണൽ ഡിസ്ട്രിക്ട് ആൻഡ് സെഷൻസ് ജഡ്ജിയും തൊടുപുഴ താലൂക്ക് ലീഗൽ സർവീസ് കമ്മിറ്റി ചെയർമാനുമായ നിക്‌സൺ എം ജോസഫ് മുഖ്യ പ്രഭാഷണം നടത്തി. തൊടുപുഴ മുൻസിഫ് മജിസ്‌ട്രേറ്റ് ഡോ. എൽസ കാതറിൻ ജോർജ് വിഷയാവതരണം നടത്തി. തൊടുപുഴ താലൂക്ക് ലീഗൽ സർവീസ് കമ്മിറ്റി സെക്രട്ടറി ആശാ കെ മാത്യു, തൊടുപുഴ ബ്ലോക്ക് പഞ്ചായത്ത് പ്രസിഡന്റ് ട്രീസ ജോസ് എന്നിവർ സംസാരിച്ചു. തൊടുപുഴ ബ്ലോക്ക് പഞ്ചായത്തിനെ പ്രതിനിധീകരിച്ച് 60 തോളം പേർ വെബിനാറിൽ പങ്കെടുത്തു.