ഇടുക്കി: ഇടുക്കി നിയോജക മണ്ഡലം ആസ്തി വികസന ഫണ്ട് ഉപയോഗിച്ച് നിർമിക്കുന്ന ചെറുതോണി ബസ് സ്റ്റാൻഡിന്റെ രണ്ടാം ഘട്ട നിർമാണ ഉദ്ഘാടനവും ശിലാസ്ഥാപനവും മന്ത്രി റോഷി അഗസ്റ്റിൻ നിർവഹിച്ചു. ചെറുതോണി ടൗണിന്റെ വികസനത്തിനായുള്ള മുഖ്യഘടകമാണ് ബസ് സ്റ്റാൻഡ്. ജില്ലാ പഞ്ചായത്ത് വിഭാവനം ചെയ്ത മാതൃക നല്ല രീതിയിൽ നടപ്പിലാക്കണം. അതേ പോലെ തന്നെ മെഡിക്കൽ കോളേജിലേക്കുള്ള ഗതാഗതം പ്രധാന റോഡ് വഴി ഉപയോഗിക്കാതെ സ്റ്റാൻഡിൽ നിന്ന് പ്രത്യേക പാതയിലൂടെ പോകാനുള്ള സൗകര്യം ഒരുക്കും. സ്റ്റാൻഡിനും പ്രധാന റോഡിനും ഇടയിലൂടെ ഒഴുകുന്ന തോടിന്റെ ഇരുവശവും കെട്ടി നവീകരിച്ചു പാർക്കിങ്ങിനും മറ്റുമുള്ള സൗകര്യം ഒരുക്കാനുള്ള നടപടികൾ സ്വീകരിക്കുമെന്നും മന്ത്രി പറഞ്ഞു. കൂടാതെ പരിപാടിയിൽ ജില്ലയുടെ വികസനത്തിനും പുരോഗതിയ്ക്കും ജില്ലാ പഞ്ചായത്ത് കാണിക്കുന്ന നിലപാടിനെ മന്ത്രി അഭിനന്ദിച്ചു. പരിപാടിയിൽ ജില്ലാ പഞ്ചായത്ത് പ്രസിഡന്റ് ജിജി കെ. ഫിലിപ്പ് അദ്ധ്യക്ഷത വഹിച്ചു. ആദ്യം അനുവദിച്ച 50 ലക്ഷത്തിന് പുറമെ കൂടുതൽ സൗകര്യങ്ങൾ വർദ്ധിപ്പിക്കാനാണ് കൂടുതലായി 50 ലക്ഷം രൂപ അനുവദിച്ചിരിക്കുന്നത്. കൂടാതെ ജില്ലാ പഞ്ചായത്തിന്റെ രണ്ട് കോടിയുടെ ഷോപ്പിംഗ് കോംപ്ലക്‌സും ഇവിടെ പണിയുന്നുണ്ട്. ചടങ്ങിൽ ജില്ലാ പഞ്ചായത്ത് ഡിവിഷൻ മെമ്പർ കെ.ജി. സത്യൻ, ബ്ലോക്ക് പഞ്ചായത്ത് മെമ്പർ ഡിറ്റാജ് ജോസഫ്, പഞ്ചായത്ത് സെക്രട്ടറി ബി. അനിൽ കുമാർ തുടങ്ങിയവർ പങ്കെടുത്തു.