അനധികൃത പാർക്കിംഗിനെതിരെ കർശന നടപടി

പഴയങ്ങാടി: പിലാത്തറ -പാപ്പിനിശ്ശേരി കെ.എസ്.ടി.പി റോഡിലെ വാഹനങ്ങളുടെ തിരക്ക് കാരണം പഴയങ്ങാടി ടൗൺ വീർപ്പുമുട്ടുകയാണ്. ഗതാഗത കുരുക്ക് പരിഹരിക്കുന്നതിനായി ഒരു വർഷം മുമ്പ് എരിപുരം പൊലീസ് സ്റ്റേഷൻ മുതൽ ബസ് സ്റ്റാൻഡ് വരെയുള്ള റോഡിന്റെ ഇരുവശത്തും അനധികൃതമായി പാർക്ക് ചെയ്ത വാഹനങ്ങൾ പഴയങ്ങാടി പൊലീസിന്റെയും ജനപ്രതിനിധികളുടെയും നേതൃത്വത്തിൽ മാറ്റിയെങ്കിലും കുറച്ചുനാൾ കഴിഞ്ഞപ്പോൾ പിന്നെയും പഴയപടിയായി. പുതിയ ബസ് സ്റ്റാൻഡ് സമീപത്തെ ഒരു ഏക്കറോളം വരുന്ന സ്ഥലത്ത് ഏഴോം പഞ്ചായത്ത് പേ പാർക്കിംഗ് സൗകര്യം ഒരുക്കിയെങ്കിലും അനധികൃത പാർക്കിംഗിന് കുറവില്ല. റോഡിന്റെ ഇരുവശവും നിർത്തിയിടുന്ന വാഹങ്ങൾക്കെതിരെ കർശന നടപടി എടുക്കുമെന്ന് പഴയങ്ങാടി പൊലീസ് പറഞ്ഞുവെങ്കിലും അതും നടപ്പിലായില്ല. നാഷണൽ പെർമിറ്റ് ലോറി - ബുള്ളറ്റ് ടാങ്കർ ലോറികൾ ഉൾപ്പെടെ രാപകൽ ഭേദമന്യേ ചീറി പായുന്നു. താവം മേൽപ്പാലം യാഥാർത്ഥ്യമായതോടെ പഴയങ്ങാടി ടൗണിൽ ഏറെ ഗതാഗത കുരുക്കുണ്ടാകുന്നത് തടയാൻ ഇത്തരത്തിലുള്ള ലോറികൾക്ക് ഇതുവഴി നിയന്ത്രണം നേരത്തെ തന്നെ ഏർപെടുത്തിയിരുന്നു. ബസ് സ്റ്റാൻഡിലേക്ക് ബസുകൾ പ്രവേശിക്കുന്ന വഴിയിലൂടെ തന്നെയാണ് ചെങ്ങൽ റോഡിലേക്കും പെട്രോൾ പമ്പിലേക്കുമുള്ള വഴി. ഇതും ഗതാഗത കുരുക്കിന് വഴിവെക്കുന്നു. റെയിൽവേ അണ്ടർ ബ്രിഡ്‌ജിൽ ഗതാഗത കുരുക്ക് നിത്യകാഴ്ചയാണ്. കഴിഞ്ഞ ദിവസം പഴയങ്ങാടി പൊലീസ് സ്റ്റേഷനിൽ സി.ഐ രാജഗോപാൽ, എസ്.ഐ ഷാജു കെ എന്നിവരുടെ നേതൃത്വത്തിൽ ഏഴോം, മാടായി പഞ്ചായത്ത് പ്രസിഡന്റുമാർ, വ്യാപാരി പ്രതിനിധികൾ, ഓട്ടോ തൊഴിലാളി പ്രതിനിധികൾ എന്നിവരുടെ യോഗം ചേരുകയും അനധികൃത പാർക്കിംഗിനെതിരെ കർശന നടപടി എടുക്കുവാൻ തീരുമാനിക്കുകയും ചെയ്തു.

പൊലീസ് ഇറങ്ങി

ഗതാഗത കമ്മിറ്റിയുടെ തീരുമാന പ്രകാരമുള്ള നിയന്ത്രണം പഴയങ്ങാടി പൊലീസ് ആരംഭിച്ചു. സി.ഐ രാജഗോപാലിന്റെയും പ്രിൻസിപ്പൽ എസ്.ഐ കെ. ഷാജുവിന്റെയും നേതൃത്വത്തിലാണ് പരിഷ്കരണ പരിപാടി ആരംഭിച്ചത്. എരിപുരം സർക്കിൾ മുതൽ പഴയങ്ങാടി പാലം വരെയുള്ള കെ.എസ്.ടി.പി റോഡിന്റെ ഇരുവശത്തുമുള്ള അനധികൃത പാർക്കിംഗ് ഒഴിപ്പിച്ച് കൊണ്ടാണ് പരിഷ്കരണ പരിപാടിക്ക് തുടക്കം കുറിച്ചത്. റോഡിന്റെ ഇരുവശവുമുള്ള വാഹനങ്ങൾ എടുപ്പിക്കുകയും ആളില്ലാത്ത വാഹനങ്ങൾക്ക് മുന്നിൽ സ്റ്റിക്കർ പതിച്ച് ഉടമസ്ഥനോട് പൊലീസ് സ്റ്റേഷനിൽ ഹാജരാവാനുള്ള നിർദ്ദേശവുമാണ് നൽകിയത്.

അടുത്ത ദിവസം തന്നെ നോ പാർക്കിംഗ് ബോർഡ് സ്ഥാപിക്കും. റെയിൽവേ അണ്ടർബ്രിഡ്ജിന് സമീപത്തായി സ്ഥിരം പൊലീസ് സാന്നിദ്ധ്യം ഉറപ്പാക്കി.

പഴയങ്ങാടി പൊലീസ്