കുന്ദമംഗലം: ക്ലാസ് മുറിയിലെ പഠനാനുഭവം പകരാൻ കുന്ദമംഗലം ഉപജില്ലയിൽ "അക്ഷര മിഠായി" ഒരുങ്ങി. വിക്ടേഴ്സ് ക്ലാസിന് ശേഷമുള്ള അദ്ധ്യാപകരുടെ ക്ലാസ് ആകർഷകവും ലളിതവുമാക്കുകയാണ് ലക്ഷ്യം.
ഒന്നാം ക്ലാസ് മുതൽ ഏഴാം ക്ലാസ് വരെയുള്ള കുട്ടികൾക്കായി കുന്ദമംഗലം ഉപജില്ലയിലെ അദ്ധ്യാപകർ ഒരുക്കിയ ഡിജിറ്റൽ പഠന സഹായിയാണ് അക്ഷരമിഠായി. ഹെഡ്മാസ്റ്റർ ഫോറത്തിന്റെ ആഭിമുഖ്യത്തിൽ രൂപം നൽകിയ "അക്ഷര മിഠായി" യുടെ പോസ്റ്റർ പ്രകാശനം വിദ്യാഭ്യാസ ഡെപ്യൂട്ടി ഡയരക്ടർ വി.പി.മിനി നിർവഹിച്ചു.
പഠനനേട്ടം ഉറപ്പാക്കുന്നതിനായുള്ള ലഘുവീഡിയോകൾ, കാർട്ടൂൺ, ആനിമേഷൻ പ്രസന്റേഷനുകൾ തുടങ്ങി നിരവധി ഡിജിറ്റൽ സങ്കേതങ്ങൾ ഉപയോഗപ്പെടുത്തിയാണ് പാഠ്യവിഷയങ്ങൾ ഒരുക്കിയിട്ടുള്ളത്. ഡിജിറ്റൽ വിഭവങ്ങളുടെ പ്രകാശനം ഡയറ്റ് പ്രിൻസിപ്പൽ വി.വി പ്രേമരാജൻ നിർവഹിച്ചു. ഉപജില്ലാ വിദ്യാഭ്യാസ ഓഫീസർ കെ.ജെ പോൾ അദ്ധ്യക്ഷത വഹിച്ചു. ഡയറ്റ് ഫാക്കൽറ്റി എം പ്രജീഷ്, എൻ.അബ്ദുറഹ്‌മാൻ, മാവൂർ ബി പി സി ഷീബ, കുന്ദമംഗലം ബി പി സി കെ.എം.ശിവദാസൻ, എച്ച് എം ഫോറം സെക്രട്ടറി കെ.കെ രാജേന്ദ്രകുമാർ, ജി.എസ് രോഷ്‌മ, രാജൻ പാക്കത്ത്, സി.കെ വിനോദ് കുമാർ, ടി. മുഹമ്മദലി എന്നിവർ പ്രസംഗിച്ചു.