രാമനാട്ടുകര: കൊവിഡിൽ പ്രതിസന്ധിയിലായ ഓട്ടോ തൊഴിലാളികളെ സഹായിക്കാൻ ഓട്ടോറിക്ഷയെ അവശ്യ സർവീസിൽ ഉൾപ്പെടുത്തണമെന്ന് ബേപ്പൂർ മണ്ഡലം മോട്ടോർ -എൻജിനിയറിംഗ് വർക്കേഴ്സ് യൂനിയൻ (എസ്.ടി.യു) ആവശ്യപ്പെട്ടു. ​കൊ​വിഡ് തകർത്ത തൊഴിൽ മേഖലയ്ക്ക് ഇന്ധന വിലക്കയറ്റം തിരിച്ചടിയായി. നിത്യ ചെലവിനും കുട്ടികളുടെ ഓൺലൈൻ പഠനത്തിനും ഗതിയില്ലാതിരിക്കുകയാണ് ഒട്ടോ തൊഴിലാളികൾ.

ഫറോക്ക്, രാമനാട്ടുകര നഗരസഭാ പരിധിയിൽ അശാസ്ത്രീയ ടി.പി.ആർ നിയന്ത്രണങ്ങളുടെ പേരിൽ ഓട്ടോ റോഡിലിറക്കാൻ പറ്റുന്നില്ല. ബസുകൾ യാത്രക്കാരെ കുത്തിനിറച്ച് സർവീസ് നടത്തുമ്പോൾ രണ്ടാളെ കയറ്റി അന്നത്തിന് വേണ്ടി സുരക്ഷ പാലിച്ച് ഓടുന്ന ഓട്ടോകൾക്ക് വൻ പിഴ ഈടാക്കുകയാണ് പൊലീസെന്നും പ്രസിഡന്റ് ഷാഫി നല്ലളവും ജനറൽ സെക്രട്ടറി സിദ്ധീഖ് വൈദ്യരങ്ങാടിയും ജില്ലാ കളക്ടർക്ക് നൽകിയ നിവേദനത്തിൽ ചൂണ്ടിക്കാട്ടി.