കട്ടപ്പന: പട്രോളിംഗിനിടെ നാടൻ തോക്കും തിരകളുമായി യുവാവിനെ പൊലീസ് അറസ്റ്റ് ചെയ്തു. നിരപ്പേൽക്കട വാലുമ്മേൽ അഭിലാഷ് ചാക്കോ(40) യാണ് പിടിയിലായത്. ഞായറാഴ്ച വൈകിട്ട് കട്ടപ്പന എസ്.ഐ. കെ. ദിലീപ്കുമാറും സംഘവും പട്രോളിംഗ് നടത്തുന്നതിനിടെയാണ് കൊച്ചുതോവാള നിരപ്പേൽ കടയ്ക്ക് സമീപം സംശയാസ്പദമായ സാഹചര്യത്തിൽ ചാക്ക് കെട്ടുമായി അഭിലാഷിനെ കണ്ടത്. തുടർന്ന് നടത്തിയ പരിശോധനയിലാണ് ചാക്കിനുള്ളിൽ നിന്ന് നാടൻ തോക്കും ഇതിലുപയോഗിക്കുന്ന തിരകളും കണ്ടെത്തിയത്. അനധികൃതമായി തോക്കും തിരകളും കൈവശം സൂക്ഷിച്ചതിന് ആയുധ നിയമപ്രകാരം അഭിലാഷിനെ അറസ്റ്റ് ചെയ്തു. ഇയാൾക്ക് തോക്ക് എവിടെ നിന്നാണ് ലഭിച്ചതെന്ന് വ്യക്തമല്ലെന്ന് പൊലീസ് പറഞ്ഞു. പ്രതിയെ കോടതിയിൽ ഹാജരാക്കി. കൂടുതൽ അന്വേഷണത്തിനായി പിന്നീട് കസ്റ്റഡിയിൽ വാങ്ങും. എസ്.ഐ. ജോസ് വർക്കി, സി.പി.ഒമാരായ എബിൻ ജോസഫ്, ടി.എസ്. ഷിജുമോൻ, ഡി. സതീഷ്, സി.ടി. ജോഷി, മഹേശ്വരൻ, ടോം, അനൂപ് എന്നിവരും പട്രോളിംഗ് സംഘത്തിലുണ്ടായിരുന്നു.