എരുമേലി : എസ്.എൻ.ഡി.പി യോഗം എരുമേലി യൂണിയൻ നിർമ്മിച്ച് നൽകുന്ന ഗുരുകാരുണ്യ ഭവനത്തിന്റെ താക്കോൽ ജനറൽ സെക്രട്ടറി വെള്ളാപ്പള്ളി നടേശൻ ഇന്ന് കണിച്ചുകുളങ്ങരയിൽ വച്ച് മൂക്കൻപെട്ടി സ്വദേശി ലൈജു സുകുമാരന് കൈമാറും. യൂണിയൻ നേതാക്കളായ എം.ആർ.ഉല്ലാസ്, കെ.ബി.ഷാജി, എം.വി.അജിത്കുമാർ, വിനോദ് എരുമേലി, സന്തോഷ് പാലമൂട്ടിൽ, വിശ്വനാഥൻ പതാലിൽ, രവി മുട്ടപ്പള്ളി, 1743ാം നമ്പർ ശാഖാ നേതാക്കളായ ശശിധരൻപാറയിൽ ,ശിവദാസ് പുത്തൻപുരയിൽ, റെജിമോൻ കാള കെട്ടി, ദിലീപ് കുമാർ തുടങ്ങിയവർ പങ്കെടുക്കും. ജന്മനാ ഒരു കൈയ്ക്ക് സ്വാധീനക്കുറവുള്ള ലൈജു മൂന്ന് കുട്ടികളും ഭാര്യയുമായി ഓലഷെഡിലായിരുന്നു താമസം.ശാഖാ ഭാരവാഹികളുടെ അഭ്യർത്ഥന പ്രകാരം യൂണിയൻ ഭാരവാഹികൾ ജനറൽ സെക്രട്ടറിയെ വിവരം ധരിപ്പിക്കുകയും വീട് പണിത് നൽകാൻ മൂക്കൻപെട്ടി ശാഖയുടെ സഹകരണത്തോടെ തീരുമാനിക്കുകയുമായിരുന്നു. മൂന്ന് മാസം കൊണ്ട് യൂണിയൻ ഭവന നിർമ്മാണം പൂർത്തീകരിച്ചു.