അടിമാലി: സര്‍ട്ടിഫിക്കറ്റിനായെത്തിയ പിതാവിനോടും മകളോടും അപമര്യാദയായി പെരുമാറിയ അടിമാലി മൃഗാശുപത്രിയിലെ സീനിയര്‍ സര്‍ജന്‍ ഡോ. വി. സെല്‍വത്തിനെ സര്‍വീസില്‍ നിന്ന് സസ്‌പെന്‍ഡ് ചെയ്തു. മൃഗസംരക്ഷണ വകുപ്പ് അണ്ടര്‍ സെക്രട്ടറിയാണ് ഇതു സംബന്ധിച്ചുള്ള ഉത്തരവ് ഇറക്കിയത്. കഴിഞ്ഞ ഒമ്പതിനാണ് സസ്പെന്‍ഷനിടയാക്കിയ സംഭവം നടന്നത്. ഇരുമ്പുപാലം പടിക്കപ്പ് സ്വദേശിയുടെ നായയ്ക്ക് വാക്‌സിനേഷന്‍ എടുത്ത സര്‍ട്ടിഫിക്കറ്റിനായാണ് അച്ഛനും മകളും മൃഗാശുപത്രിയില്‍ എത്തിയത്. ആവശ്യം ഉന്നയിച്ച ഇരുവരോടും സർജൻ അപമര്യാദയായി പെരുമാറി എന്നതാണ് പരാതി. സര്‍ജന്‍ മദ്യലഹരിയില്‍ ആയിരുന്നെന്നും പരാതിയില്‍ പറഞ്ഞിരുന്നു. ഇതിന്റെ വീഡിയോദൃശ്യവും സാമൂഹ്യമാധ്യമങ്ങളില്‍ പ്രചരിച്ചിരുന്നു. ഇതിന്റെ അടിസ്ഥാനത്തില്‍ ജില്ലാ മൃഗസംരക്ഷണ വകുപ്പ് നടത്തിയ അന്വേഷണ റിപ്പോര്‍ട്ടിന്റെ അടിസ്ഥാനത്തിലാണ് ഇന്നലെ സര്‍ജനെ സസ്‌പെന്‍ഡ് ചെയ്തത്.