പന്തളം: സുഹൃത്തിനൊപ്പം ബൈക്കിൽ യാത്രചെയ്ത യുവതി വാഹനാപകടത്തിൽ മരിച്ചു. സുഹൃത്തിനെ പരിക്കുകളോടെ പന്തളത്തെ ആശുപത്രിയിൽ പ്രവേശിപ്പിച്ചു. തിരുവനന്തപുരം കുളത്തൂർ പുളിമൂട് വിളയിൽ വീട്ടിൽ പ്രവീണിന്റെ ഭാര്യ സുമിത്ര(35)യാണ് മരിച്ചത്. ബൈക്ക് ഓടിച്ചിരുന്ന നെടുമങ്ങാട് തൊളിക്കോട് എൻ.എം.മൻസിലിൽ അബ്ദുൽ മജീദിന്റെ മകൻ അൻസിലി(24)നാണ് പരിക്കേറ്റത്.

വ്യാഴാഴ്ച പുലർച്ചെ നാലരയോടെ എം.സി.റോഡിൽ കുളനട ടി.ബി. ജംഗ്ഷന് സമീപമുള്ള വളവിലാണ് അപകടം. ബൈക്ക് നിയന്ത്രണംവിട്ട് റോഡിലേക്ക് മറിഞ്ഞപ്പോൾ അതുവഴി വന്ന വാൻ ഇടിക്കുകയായിരുന്നുവെന്ന് പൊലീസ് പറഞ്ഞു. ഇരുവരെയും പന്തളത്തെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും സുമിത്രയെ രക്ഷിക്കാനായില്ല. രണ്ടുവർഷത്തോളമായി ഭർത്താവുമായി അകന്നുകഴിയുന്ന സുമിത്രയ്ക്ക് ഒരു കുട്ടിയുണ്ട്. തിരുവനന്തപുരത്തുനിന്ന് എറണാകുളം വൈറ്റിലയിലേക്ക് പോവുകയായിരുന്നു ഇവരെന്ന് പൊലീസ് പറഞ്ഞു. അവിവാഹിതനായ അൻസിൽ ഗൾഫിൽ ഡ്രൈവറാണ്.