ന്യൂഡൽഹി: കൊവിഡ് വ്യാപനം ശക്തമായ കേരളം ഉള്‍പ്പടെ ആറ് സംസ്ഥാനങ്ങള്‍ കേന്ദ്രസംഘം സന്ദര്‍ശിക്കും. കേരളം, അരുണാചല്‍ പ്രദേശ്, ത്രിപുര, ഒഡീഷ, ഛത്തീസ്‌ഗഡ്, മണിപ്പൂര്‍ എന്നിവിടങ്ങളിലാണ് സന്ദര്‍ശനം.
ലോക്ക്‌ഡൗൺ അടക്കം നടപ്പിലാക്കിയിട്ടും കൊവിഡ് രോഗബാധിതരുടെ എണ്ണത്തിൽ വലിയ കുറവുണ്ടാകാത്ത പശ്ചാത്തലത്തിലാണ് കേരളമടക്കമുള്ള സംസ്ഥാനങ്ങളിലെ സാഹചര്യം വിലയിരുത്താൻ കേന്ദ്രസർക്കാർ തീരുമാനിച്ചിരിക്കുന്നത്. ആരോഗ്യമന്ത്രാലയത്തിൽ ചേർന്ന ഉന്നതതല യോഗത്തിലാണ് ഇതുസംബന്ധിച്ച തീരുമാനമുണ്ടായത്. രോഗബാധ കൂടുതലുള്ള ജില്ലകളിലാകും കേന്ദ്രസംഘം സന്ദർശനം നടത്തുക.
കേരളത്തിൽ ഇപ്പോഴും ടെസ്റ്റ് പോസിറ്റിവിറ്റി നിരക്ക് പത്തിന് മുകളിൽ തന്നെയാണ്. ഇതോടൊപ്പം വൈറസ് വകഭേദങ്ങളും റിപ്പോർട്ട് ചെയ്‌തിട്ടുണ്ട്. കർശനമായി ലോക്ക്‌ഡൗൺ നടപ്പാക്കിയിട്ടും കേരളത്തിൽ രോഗവ്യാപനം കുറയാത്തത് കേന്ദ്രം ഗൗരവമായാണ് കാണുന്നത്.