തിരുവനന്തപുരം: ഒന്നര മാസത്തോളം കടകൾ അടഞ്ഞുകിടക്കുന്നതിനാൽ നഷ്‌ടം വല്ലാതെ വർദ്ധിച്ചതായും എല്ലാ കടകളും തുറന്ന് പ്രവർത്തിക്കാൻ സർക്കാർ അനുവദിക്കണമെന്നും വ്യാപാരി വ്യവസായി ഏകോപന സമിതി. കൊവിഡ് ചട്ടങ്ങൾ പാലിച്ച് കടകൾ പ്രവർത്തിക്കാൻ അനുവദിച്ചില്ലെങ്കിൽ ചൊവ്വാഴ്‌ച എല്ലാ കടകളും അടച്ചിടും, വ്യാഴാഴ്‌‌ച മുതൽ അനിശ്ചിതകാല സമരം ആരംഭിക്കുമെന്നും വ്യാപാരി വ്യവസായി ഏകോപന സമിതി നേതാക്കൾ അറിയിച്ചു.
നിയന്ത്രിത സമയത്ത് കൊവിഡ് മാനദണ്ഡങ്ങൾ പാലിച്ച് വ്യാപാരത്തിന് അനുവദിക്കണമെന്നാണ് വ്യാപാരി വ്യവസായി ഏകോപനസമിതി നേതാക്കൾ ആവശ്യപ്പെടുന്നത്. കടകൾ തുറക്കാത്തത് മൂലം സാധനങ്ങൾ നശിച്ചതും, കടബാദ്ധ്യതയും, വാടകയ്‌ക്ക് കട നടത്തുന്നവ‌ർക്ക് അതിന്റെ ബാദ്ധ്യതയുമെല്ലാം വർദ്ധിച്ചിരിക്കുകയാണെന്നും നേതാക്കൾ അറിയിക്കുന്നു.