ന്യൂയോർക്ക്: ലോകത്ത് കൊവിഡ് ബാധിതരുടെ എണ്ണം പതിനെട്ടര കോടി പിന്നിട്ടു. വേൾഡോമീറ്ററിന്റെ കണക്കുപ്രകാരം കഴിഞ്ഞ ഇരുപത്തിനാല് മണിക്കൂറിനിടെ നാല് ലക്ഷത്തിലധികം പേർക്കാണ് രോഗം സ്ഥിരീകരിച്ചത്. മരണസംഖ്യ നാൽപത് ലക്ഷം കടന്നു.നിലവിൽ ഒരു കോടി പതിനാറ് ലക്ഷം പേരാണ് ചികിത്സയിലുള്ളത്.

ഇന്നലെ ബ്രസീലിലാണ് ഏറ്റവും കൂടുതൽ പേർക്ക് രോഗം സ്ഥിരീകരിച്ചത്. അറുപതിനായിരത്തിലധികം കേസുകളാണ് റിപ്പോർട്ട് ചെയ്തത്. ഇതോടെ ആകെ രോഗബാധിതരുടെ എണ്ണം ഒരു കോടി എൺപത്തിയെട്ട് ലക്ഷമായി ഉയർന്നു.നാല് ലക്ഷത്തിലധികം പേർ മരിച്ചു.

പ്രതിദിന കൊവിഡ് കേസുകളിൽ രണ്ടാം സ്ഥാനത്ത് ഇന്ത്യയാണ്. രാജ്യത്ത് കഴിഞ്ഞ ദിവസം 34,703 പേർക്കാണ് വൈറസ് ബാധ സ്ഥിരീകരിച്ചത്. ഇതുവരെ 3.06 കോടി പേർക്ക് രോഗം സ്ഥിരീകരിച്ചു.നിലവിൽ 4.64 ലക്ഷം പേരാണ് ചികിത്സയിലുള്ളത്. 97.17 ശതമാനമാണ് രോഗമുക്തി നിരക്ക്.

രോഗബാധിതരുടെ എണ്ണത്തിൽ അമേരിക്കയാണ് ലോകത്ത് ഒന്നാം സ്ഥാനത്ത്. മൂന്ന് കോടി നാൽപത്തിയാറ് ലക്ഷം പേർക്കാണ് യുഎസിൽ രോഗം സ്ഥിരീകരിച്ചത്. 6.21 ലക്ഷം പേർ മരിച്ചു.